Մոսկվայի food city շուկայում երեկ գիշերվանից արգելվել է Հայաստանից արտահանված ծիրանի վաճառքը: Այս մասին Aravot.am-ին ահազանգեց ծիրան արտահանող Լեռնիկ Ավագյանը: Ըստ նրա՝ արդեն 65 ֆուռ ծիրան է հանվել Մոսկվայի շուկայից, որը պատկանում է ադրբեջանցու:
«Գիշերը բոլոր մեքենաները դուրս են հանել շուկայից, վարորդներին ստիպել են հանել մեքենաները՝ առանց մեր իմացության: Նույնիսկ հայկական համարներով մեքենաներով քաղաքացիներն այլեւս իրավունք չունեն մտնել այդ շուկա, առեւտուր անել: Դրսից ադրբեջանցիներ են եկել շուկա, տեղի շուկայի ադրբեջանցիներին վախեցրել են, նրանց նկարել են՝ ասելով, եթե հայերի հետ առեւտուր անեք, ձեր նկարները կուղարկվեն Ադրբեջան, ձեր ընտանիքներին վնաս կտան: Դա ինձ մտերիմ ադրբեջանցի է պատմել, որը միշտ ինձնից ապրանք էր գնում, ասաց՝ հիմա չենք կարող, վախենում ենք»,- պատմեց Լեռնիկ Ավագյանը: Նա նաեւ ասաց՝ ծիրանով բարձված մի քանի ֆուռերի վարորդներին էլ, որոնք ճանապարհին են, հեռախոսով փոխանցել են կանգ առնել, չշարժվել, մինչեւ շուկայում իրավիճակը շտկվի:
Հայ արտահանողները խնդրել են տեղի հայերին դիմել ՌԴ-ում ՀՀ դեսպանատանը. «Սա նախ եւ առաջ ապտակ է Ռուսաստանի կառավարությանը, նշանակում է՝ ադրբեջանցիները Մոսկվայում ունեն իրենց պետությունը, ոնց ուզում են, այնպես անում են: Այստեղ մի քանի բեռնափոխադրողի հարց չէ, սա մեծ հարված է ՀՀ գյուղատնտեսությանը, պատկերացրեք, եթե այս ապրանքը դուրս չբերենք, Հայաստանի գյուղատնտեսությունը կվերանա»:
Կարդացեք նաև
Ադրբեջանցիների հերթական սադրա՞նք. Մոսկվայի Ֆուդ Սիթի շուկայից հանել են հայկական մթերքներով ֆուռերը
Ադրբեջանցիների հերթական սադրա՞նք. Մոսկվայի Ֆուդ Սիթի շուկայից հանել են հայկական մթերքներով ֆուռերը
Gepostet von Armenpress am Freitag, 17. Juli 2020
Արփինե ՍԻՄՈՆՅԱՆ