Շախմատի միջազգային ֆեդերացիան Եկատերինբուրգում հավակնորդների մրցաշարը վերսկսելու մասին որոշում կկայացնի համավարակային իրավիճակն ուսումնասիրելուց հետո միայն:
«Հաստատում ենք, որ հարցում ենք ուղարկել Սվերդլովսկի մարզի շախմատի ֆեդերացիա՝ մրցաշարը հոկտեմբերի 28-ին վերսկսելու հնարավորության մասին, սակայն այն որպես կայացած իրողություն համարելը առայժմ ժամանակավրեպ է»,-ասվում է ՖԻԴԵ-ի տարածած հայտարարությունում: Նշվում է նաեւ, որ վերսկսումը հնարավոր է բացառապես խաղացողների համար կայուն ու անվտանգ համավարակային իրավիճակի պայմանում:
Շախմատի աշխարհի թագի համար մրցամարտը մեկնարկել էր Եկատերինբուրգում մարտի 17-ին, սակայն դադարեցվել մարտի 26-ին՝ կորոնավիրուսի համավարակի պատճառով: Մասնակիցները հասցրել էին խաղալ առաջին շրջանի բոլոր պարտիաները: Մրցաշարային աղյուսակը 4,5 միավորով գլխավորում են ռուսաստանցի Յան Նեպոմնյաշչին եւ ֆրանսիացի Մաքսիմ Վաշյե-Լագրավը: Նրանց հաջորդում են ռուսաստանցի Ալեքսանդր Գրիշչուկը, հոլանդացի Անիշ Գիրին, ամերիկացի Ֆաբիանո Կարուանան, չինացի Վան Հաոն՝ 3,5-ական միավոր, ռուսաստանցի Կիրիլ Ալեքսեյենկոն եւ չինացի Դին Լիրենը՝ 2,5-ական միավոր:
Մրցաշարի հաղթողը իրավունք կնվաճի շախմատի աշխարհի չեմպիոնության համար մրցամարտ անցկացնել գործող չեմպիոն, նորվեգացի Մագնուս Կարլսենի հետ:
Կարդացեք նաև
Աշոտ ՀԱԿՈԲՅԱՆ
