ԱԺ փոխնախագահ Ալեն Սիմոնյանը հայտարարել էր, որ գոյություն ունեցող քաղաքական ուժերի հետ համեմատած՝ 10-20 անգամ ավելի բարձր է այսօրվա իշխանության վարկանիշը. «Այ դա է մեր խնդիրը, որ այսօր մենք ունենք ոչ միայն իշխանության, այլ նաեւ ընդդիմության հետ կապված ճգնաժամ, որովհետեւ ընդդիմություն, որպես այդպիսին, չկա: Ընդդիմությունը ցավոք այն նախկիններն են, որոնք առաջարկ չունենալով՝ իրենց անձնական շահերը սպասարկելու համար քաղաքական հայտարարություններով փորձում են ինչ-որ բան ապահովել»:
Այս առնչությամբ այսօր ԱԺ ճեպազրույցների ժամանակ «Լուսավոր Հայաստան» խմբակցության ղեկավար Էդմոն Մարուքյանը մեր հարցին ի պատասխան ասաց. «Այս նույն մարդիկ ասում են նաեւ, որ լրագրողներ էլ չկան: Բայց լրագրողներ չկա՞ն: Բնականաբար, ընդդիմություն էլ կա: Այդ հողից կտրված հայտարարությունները գոնե ես լսել եմ այն ժամանակներում, երբ մեր գործընկերներին ասում էինք՝ ամեն ինչ վատ է գնում, պրոբլեմներ են լինելու, ձեզ ժողովուրդը գալու է սրբի՝ տանի: Ասում էին՝ այս ի՞նչ եք խոսում, ընտրությունները նոր են եղել, չտեսա՞ք ոնց հաղթեցինք, օրինակ, 2017-ին: Հիմա նույն իրականությունից կտրված վիճակի մեջ է այսօրվա իշխանությունը: Մի անհանգստացեք, ամեն ինչ իր տեղը կընկնի: Եթե ժողովուրդը համակերպվում է եւ ասում ՝ ես OK եմ այս վիճակի հետ, ոչ մի ընդդիմություն չի կարող այդ ժողովրդին հանի այս իշխանության դեմ: Եթե ժողովուրդը չի համակերպվում, բնականաբար, այդ պրոցեսները կառաջնորդվեն: Փորձել գցել ուրիշի վրա՝ չի ստացվի: Եթե իրենք ունեին այդ ռեյտինգը, այսպես ասած, ընտրություններ պիտի անեին, այդտեղից կերեւար: Հիմա ընտրությունները հետաձգվեցին, ինձ թվում է՝ հունիսին կլինի ու հունիսին կտեսնենք՝ կա, ընդդիմություն, չկա: Մի բան ակնհայտ է՝ իշխանության ներկայացուցիչները հանգիստ փողոցում ման գալու հնարավորություն չունեն: Ոչ թե ինչ-որ տեռոր է երկրում, այլ երես չունեն իրենց ղեկավարած, կայացրած որոշումների արդյունքում: Դա ռեյտի՞նգ է, պրոբլեմ չկա, վայելեք ձեր ռեյտինգը»:
Դիտարկմանը՝ իրենք ասում են՝ ընդդիմությունը նախկիններն են, որոնք անձնական շահ ունեն՝ Մարուքյանը արձագանքեց. «Իրենց ձեռնտու է այդպես ասեն, որովհետեւ ժողովրդին ահաբեկում են, ասում են՝ նախկինները գալիս են, եկեք, համախմբվեք մեր շուրջը, փրկեք մեզ, գալիս են մեզ կեղեքեն ձեր հետ: Բայց այդպես չի: Նախկինները ընդդիմության մի հատվածն են: Բազմաթիվ ուժեր կան, որ երբեք ՀՀ-ում իշխանություն չեն ունեցել: Այսօր իրենք են նախկին, բայց չեն զգում: «Սասունցի Դավթի» մեջ մի դրվագ կա, երբ որ Մըսրա Մելիքին թրով խփում է, ասում է՝ Դավիթ, մին էլ արի, այսինքն, չի ստացվել, ասում է՝ լա մի քեզ թափ տուր, թափ է տալիս, երկու կես է լինում: Այս իշխանությունը մի հատ որ թափ տա իրեն, երկու կես կլինի, արդեն թրով մեջտեղից խփած է, իրենք չեն զգում, տաք են, մի հատ թափ տվեց, քանդվելու է: «Սասունցի Դավիթ» գոնե կարդան»:
Հռիփսիմե ՋԵԲԵՋՅԱՆ
