Այսօր «Հայաստան» դաշինքը ներկայացրեց «365 օր. Ապագան սկսվում է հիմա» նախընտրական ծրագիրը:
ԱԺ պատգամավոր Աննա Գրիգորյանը, որը դաշինքի անդամ է, կրթության, գիտության քաղաքականությունը ներկայացրեց՝ ասելով, որ իրենց համար այն առաջնահերթ ոլորտներից է: Դաշինքը բացառում է լեռնային, բարձր լեռնային գոտիներում դպրոցների օպտիմալացումը, որովհետեւ դա նպաստում է, որ գյուղերը դատարկվեն ու մարդաթափ լինեն:
Գյուղերում դպրոցների աշխատանքը լիարժեք կազմակերպելու ու ուսուցիչների պակասը լրացնելու համար ներդրվելու է համայնքներում աշխատող ուսուցիչների սոցիալական երաշխիքների համակարգ: Մանկավարժը մեր օրերում կորցնում է այն հեղինակությունն ու դերը, որ պետք է ունենար, ուստի խոստանում են վերարժեւորել մանկավարժի տեղն ու դերը, պարտավորվում հատուկ հոգածություն դրսեւորել նրանց նկատմամբ, աշխատավարձերը բարձրացնել, բյուջետային ծախսեր անել. «Պետությունը չպետք է տնտեսի դպրոցի վրա առհասարակ»:
Ըստ Աննա Գրիգորյանի, հաճախ նախակրթարանների աշխատակիցները անտեսված են ու անարդար է, որ նրանք չեն օգտվում սոցփաթեթների առավելությունից, այդ սխալը պետք է շտկել:
Կարդացեք նաև
«Հայաստան» դաշինքը մտադիր է մինչեւ 50%-ով ավելացնել բնագիտություն, տեխնոլոգիա, ճարտարագիտություն, մաթեմատիկա եւ հայագիտական ուղղություններով մասնագիտական ֆինանսավորումը մեկ ուսանողի մասով: Խոստանում են, որպես այդ շղթայի մաս, գիտությանը տրվող գումարը էապես ավելացնել. «Մենք կիրառելու ենք գիտության կառավարման եւ ֆինանսավորման արդյունավետ մոդել: Սահմանելու ենք գիտության գերակա ուղղությունները՝ ծառայեցնելով երկրի անվտանգային խնդիրներին, ռազմարդյունաբերության ոլորտին»: Դաշինքը խոստանում է գիտության արդյունքը կիրառական ու սպառողական դարձնել, աջակցել գիտական արդյունքի ստեղծման բոլոր փուլերի ժամանակ ու այն առեւտրայնացնել: Կձեւավորվի անձեռնմխելի կապիտալով պետական հիմնադրամ, որը կֆինանսավորի գիտական առաջնահերթությունների ուղղությամբ արտերկրի առաջատար մասնագետների՝ մեր գիտական եւ բուհական համակարգերում մասնակի եւ ամբողջական ներգրավվածությամբ դասավանդումը:
Խոստանում են նաեւ թվայնացնել ընդունելության քննությունների միասնական համակարգը, քննությունների որակը վերահսկելի դարձնել, մարզերի բնակիչները կկարողանան քննություն հանձնել իրենց մարզում:
Եզրափակելով խոսքը՝ Աննա Գրիգորյանն ասաց, որ ուժեղ Հայաստանը ինտելեկտուալ Հայաստանն է, որտեղ կրթությունն է ծնում իրավունք:
Հռիփսիմե ՋԵԲԵՋՅԱՆ
