Վերջին շրջանում համացանցում լուրեր տարածվեցին, որ Վանաձոր բժշկական կենտրոնի շտապօգնության նախկին մասնաշենքում դիեր են պահված: Ականատեսներից Հակոբ Միկոյանը, որ դիերը հայտնաբերելուն պես զանգահարել էր ոստիկանություն, մեզ հետ զրույցում ասաց, որ պարկի մեջ կնոջ դի է հայտնաբերել:
Հակոբն ու երեք ընկերները նշված տարածքը դիտարկել են որպես անասնաբուժարան եւ կացարան, փորձել հասկանալ թե որքանով է համապատասխանում իրենց պատկերացումներին, սակայն ներս մտնելուն պես այլ տեսարանի են ականատես եղել. «Ընդհանրապես չէինք էլ մտածում, որ դուռը բաց կլինի, բայց պարզվեց, որ բաց է: Ներս մտանք ու առաջին իսկ սենյակում սեւ պարկ էր գետնին գցած, սկոտչով բերանը փակած ու սկոտչի տակ էլ մարդու անուն ազգանունն էր գրված: Եվ զարմանալին այն էր, որ դուռ ու լուսամուտ բացած ու ջարդված էր, եւ ցանկացած կենդանի կարող էր ներս մտնել»:
Ոստիկանությանը տեղեկացնելուց հետո Հակոբը ստանում է հետադարձ զանգ. «Որոշ ժամանակ հետո զանգեցին ու ասացին, որ կան դիեր ու մի հատ չէ, մի քանի հատ է: Հարցրեցին՝ ձե՞ռք եք տվել, թե՞ ոչ, ասեցի, որ՝ ոչ: Ասացին, որ լավ է, որ ձեռք չեք տվել, քանի որ քովիդով հիվանդի մարմին է»:
Հարցի վերաբերյալ փորձեցինք զրուցել Վանաձորի բժշկական կենտրոնի տնօրեն Վահագն Մկրտչյանի հետ, սակայն վերջինիս ուղղված մեր զանգերն ու նամակները մնացին անպատասխան:
Տաթեւիկ ՂԱԶԱՐՅԱՆ
Կարդացեք նաև
Լուսանկարում՝ Վանաձորի ԲԿ-ի շտապօգնության նախկին մասնաշենքի սենյակներից մեկն է
