«Մեզ համար որոշումն անակնկալ չէր։ Ես այդ մասին դեռեւս եզրափակիչ խոսքում եմ ասել, դեռ այդ ժամանակ էր ակնհայտ, թե ինչպիսին էր գործընթացը։ Որոշումն ակնկալելի էր»,-ՍԴ-ում քիչ առաջ լրագրողների հետ ճեպազրույցում ասաց «Պատիվ ունեմ» դաշինքի ներկայացուցիչ Դավիթ Հարությունյանը։
Հիշեցնենք, որ ՍԴ-ն այսօր հրապարակեց «Հայաստան» եւ «Պատիվ ունեմ» դաշինքների, «Զարթոնք» ու «Հայոց հայրենիք» կուսակցությունների՝ 2021թ․ հունիսի արտահերթ խորհրդարանական ընտրությունների արդյունքները վիճարկող դիմումների վերաբերյալ որոշումը։
Բարձր դատարանը որոշեց ԿԸՀ-ի՝ ընտրությունների արդյունքների ամփոփման վերաբերյալ որոշումը թողնել ուժի մեջ։ «ՍԴ որոշումն իրավական որոշում է, բայց ընդունված քաղաքական ազդեցությամբ»,-հավելեց Դավիթ Հարությունյանը։ «Հայաստան» դաշինքի ներկայացուցիչ Արամ Վարդեւանյանն էլ ասաց, որ ՍԴ որոշումն իսկապես կանխատեսելի էր․ «ՍԴ-ի հանդեպ քաղաքական հետապնդումները պարզ եւ հստակ էին։ Իննը դատավորից ամեն մեկը պատկերացրեց, որ իշխանությանը դեմ գնալիս իրեն կփռեն ասֆալտին, կկտրեն մատները, կլինի վենդետա․․․ՍԴ-ն այս պայմաններում չունեցավ խիզախություն եւ ընտրությունների արդյունքներն անվավեր չճանաչեց։ Սակայն սրանից իրականությունը չի փոխվում։ Սա քաղաքական հրահանգով որոշում էր»։
Լուիզա ՍՈՒՔԻԱՍՅԱՆ
Ընդիմադիրները՚գոնե չպետք է մեկնաբանեն ՍԴ որոշումը եվ օրինակ ծառայեն իշխանությունների համար