Սեպտեմբերի 9-ին «Արամ Խաչատրյան» համերգասրահում կկայանա «Հայկական ռոքը հանուն քաղցկեղ ունեցող երեխաների» խորագրով բարեգործական համերգ՝ ուղղված քաղցկեղ և արյան հիվանդություններ ունեցող երեխաների, երիտասարդների բուժման աջակցությանը: Թեմայի վերաբերյալ «Արմենպրեսի» մամուլի սրահում կայացած ասուլիսում «Սիթի օֆ Սմայլս/Ժպիտների քաղաք» բարեգործական հիմնադրամի գործադիր տնօրեն Էսթեր Դեմիրճյանը նշեց, որ համերգը յուրահատուկ է լինելու, քանի որ համախմբվել են 3 եզակի խմբեր. «Համերգի նպատակն էլ շատ վեհ է, քանի որ հասույթն ուղղվելու է քաղցկեղ ունեցող երեխաների բուժմանը, ինչ համար շնորհակալ եմ խմբերին, որ շատ արագ եւ պատրաստակամությամբ արձագանքեցին»:
Էսթեր Դեմիրճյան
Նրա խոսքով, The Beautified Project-ը երկար դադարից հետո բեմ է բարձրանալու, իսկ «Նեմրա» եւ «Լավ էլի» խմբերը, թեեւ բավականին ակտիվ են եղել իրենց համերգային ծրագրերով, սակայն, այնքան սիրված են, որ մարդիկ կցանկանան կրկին ունկնդրել նրանց: Էսթեր Դեմիրճյանը նաեւ շեշտեց, որ համերգին հետաքրքիր անակնկալ է սպասվում:
Մհեր Մանուկյան
«Լավ էլի» ռոք խմբի հիմնադիր Մհեր Մանուկյանն ասաց, որ շնորհակալ են նման առաքելությամբ հանդես գալու համար. «Մենք պարբերաբար կարիք ունենք ինքներս մեզ հիշեցնելու, որ ամեն ինչ շահի համար չէ: Այս նյութական աշխարհում ինքներս մեզ պետք է հիշեցնենք, որ կան կարեւոր արժեքներ, մարդասիրություն, կարեկցանք, ձեռք մեկնելու պատրաստակամություն… Մեր լավագույն բարեկամներն են` թե The Beautified Project-ը , թե «Նեմրան», եւ ինձ համար «Արամ Խաչատրյան» համերգասրահում հանդես գալը առանձին մի պատմություն է եւ բոնուս»:
Վան Նեմրա
«Նեմրա» խմբի մենակատար Վան Նեմրան ասաց, որ իրենց խումբը ստեղծման օրվանից միշտ մասնակցել է բարեգործական համերգների, եւ այժմ էլ սիրով են համաձայնել մաս կազմել այս նախագծին. «Համերգն առանձնահատուկ է լինելու իր ձեւաչափով, նաեւ երաժշտական ֆորմատով, քանի որ ակուստիկ համերգ է լինելու: Կարծում եմ շատ գեղեցիկ մթնոլորտ կստեղծենք»:
Կարդացեք նաև
Անդրե Սիմոնյան
The Beautified Project ռոք խմբի հիմնադիր Անդրե Սիմոնյանի խոսքով, The Beautified Project խումբը պատրաստվում էր նշել իր հիմնադրման 15-ամյակը 2020թ, սակայն նախ քովիդի խնդիրն առաջ եկավ, այնուհետեւ մեր երկրին պատերազմը պատուհասեց. «Այս ամենից հետո մենք իրականում դրդապատճառ չունեինք, որ միավորվեինք եւ բեմ բարձրանայինք: Եվ երբ «Սիթի օֆ Սմայլս»-ից ինձ հետ կապվեցին, անգամ մեկ վայրկյան չմտածեցի` ոչ ասելու մասին»:
Նա նաեւ շնորհակալություն հայտնեց «Նեմրային» եւ «Լավ էլի»-ին համատեղ հանդես գալու համար:
Անդրե Սիմոնյանն ասաց, որ իրենց համար շատ բարդ էր ընտրել համերգին հնչելիք երգերը, քանի որ 4 ալբոմ ունեն, բայց այնուամենայնիվ առանձնացրել են իրենց խմբի շատ սիրված անգլերեն երգերը եւ 2-3 հայերեն ստեղծագործություն:
Վան Նեմրան նշեց, որ ընդհանուր խմբով են հանդես գալու` հարվածային գործիքներով, իսկ երգերը առանձնացվել են իրենց 2 ալբոմներից: Մհեր Մանուկյանն ասաց, որ իրենք եւս բարդ ընտրության առաջ էին կանգնած, քանի որ «Արամ Խաչատրյան» համերգասրահի դահլիճը շատ բարձր երաժշտության համար է նախատեսված, եւ երկմտում էին` արդյոք իրավունք ունե՞ն այդ բեմում լինելու, երկրորդը երգերի ընտրության հետ էր կապված: Նա հավելեց, որ փորձել են ծրագրում մտցնել եւ հանդարտ երգեր, բայց չեն խուսափել մի քանի ակտիվ ստեղծագործությունից, որոնց իրենց ունկնդիրը միշտ սպասում է:
Գոհար ՀԱԿՈԲՅԱՆ
