«Հետքը» հրապարակել էր «Քաղաքացիական պայմանագրի» այն պատգամավորների ցանկը, որոնք ԱԺ ընտրությունների ժամանակ բավականին շռայլ են գտնվել եւ ՔՊ-ին նվիրաբերել են հարյուր հազարավոր եւ միլիոնավոր դրամներ: Նվիրատվության ընդհանուր արժեքը կազմել է 105,5 մլն դրամ:
ՔՊ պատգամավոր Նարեկ Գրիգորյանը բավականին խոշոր գումար՝ 5 մլն դրամ է նվիրաբերել կուսակցությանը:
Aravot.am-ի հետ զրույցում նա իր նվիրաբերություն այսպես պարզաբանեց. «Ոչ, ես բերել եմ 10 մարդ, ովքեր այդ գումարը վճարել են, նվիրաբերել են»: Ճշտեցինք՝ այսինքն, ձեր գրպանից չեք վճարել՝ նա պատասխանեց. «Իհարկե, ոչ: Քարոզարշավին այդպես է՝ վճարում են ու նշում են, թե ում համար ու ում անունից է»:
Մեր դիտարկմանը, որ մի շարք հարցադրումներ են առաջանում այդ նվիրաբերության հետ կապված, մի կողմից ձեր խմբակցությունը 250 հազար դրամ է սահմանում պատգամավորի գործունեության վճարը, հիմնավորումներ եք բերում, որ միջոցները չեն բավարարում մարզեր գնալու, ընտրողների հետ հանդիպելու համար, մյուս կողմից նվիրաբերություններ եք անում՝ Նարեկ Գրիգորյանն արձագանքեց. «Դա ուղղակի քարոզարշավի դրամահավաքի մասին է խոսքը ու այդտեղ ուրիշ եզրակացություն չէր էլ կարող լինել»:
Կարդացեք նաև
Նաեւ հետաքրքրվեցինք՝ դուք արդեն 2 ամիս է, ստացել եք 250 հազար դրամ պատգամավորական գործունեության համար տրվող գումարը, ինչպե՞ս եք այն ծախսել: Նա պատասխանեց. «Եթե գրավոր դիմեք, ես գրավոր հաշվետվությամբ կարող եմ ներկայացնել, ոչ մի խնդիր չկա»:
Երբ հարցրեցինք՝ գոնե ըստ նպատակի՞ եք ծախսել, մարզե՞ր եք գնացել, ընտրողների հե՞տ եք հանդիպել՝ նա պատասխանեց. «Նախ, ես սկսեմ նրանից, որ երբեք Երեւանում չեմ մնացել, միշտ գնացել, հետ եմ եկել Գեղարքունիքի մարզ ու դա չէր էլ կարող հերիքել տրանսպորտին: Եթե ես այդ գումարը նպատակային օգտագործած չլինեի, Երեւանում վարձած տուն կունենայի ու Երեւանում կապրեի»: Նա ասաց, որ ինքը բնակվում է Գեղարքունիքի մարզում ու ամեն օր մարզից գալիս է Ազգային ժողով՝ աշխատանքի: Թեեւ կարող է Երեւանում բնակարան վարձակալել՝ պետբյուջեի հաշվին, ինչպես անում են որոշ պատգամավորներ, բայց շեշտեց՝ ինքը այդ քայլին չի գնացել. «Ես դրանից հրաժարվել եմ ու հենց ի սկզբանե, որովհետեւ ես մարզից եմ ընտրվել ու մարզի հետ կապված ես ամեն օր այստեղ եմ մնում, որ ժողովրդի դարդ ու ցավով զբաղվեմ»:
Հռիփսիմե ՋԵԲԵՋՅԱՆ
