«Ծանրամարտի Հայաստանի առաջնությունում օգտագործվում են միջազգային ստանդարտներին համապատասխանող ELEIKO մակնիշի մրցակցական ծանրաձողեր, իսկ պայքարն ընթանում է $ 17 հազար արժողությամբ մրցակցական մրցահարթակի վրա: Դրանք անցած տարի մեզ նվիրել է կառավարությունը, ինչի համար մեր շնորհակալությունն ենք հայտնում: Նախկինում էլ Հայաստան ELEIKO մտել է, բայց մրցակցական չի եղել: Մենք 20 տարի այդ որակի գույք չենք ունեցել:
Խորին շնորհակալություն ենք հայտնում նաեւ ՀԱՕԿ-ին, որն աշխարհի վերջին առաջնությունից հետո, որքան էլ բավարարված չէ մեր արդյունքներից, միեւնույն է, աջակցում է մեր մարզիկներին բժշկական ու վերականգնողական գործընթացներում: Քանի որ առիթը ստեղծվեց, ասեմ, որ ամենաշատը ես եմ ուզում, որ աշխարհի չեմպիոններ շատ ունենանք ու ես լինեմ աշխարհի չեմպիոնների մարզիչ: Սակայն սպորտում երբեմն կարեւոր է հաջողությունը թե մարզիկների, թե մարզիչների համար: Այս ամենով հանդերձ, իրականություն է, որ արդյունքների տեսանկյունից մեր թշնամիները չեն կարող մեր կողքը կանգնել: Հատկապես մեր տղաները այնպիսի արդյունքներ են ցույց տալիս, որ անգամ ծանրամարտի շատ ու շատ գերտերությունների համար դրանք երազանք են», – Aravot.am-ի հետ զրույցում ասաց Հայաստանի ծանրամարտի ֆեդերացիայի գլխավոր քարտուղար Փաշիկ Ալավերդյանը եւ հավելեց, որ իր որոշումով Հայաստանի առաջնությանը մասնակցում են բոլոր լավագույնները՝ անկախ ունեցած տիտղոսներից:
«Ուզում եմ, որ հասարակությունը հենց Երեւանում տեսնի իր հերոսներին, նրանց պայքարը եւ հաղթանակները»,-ասաց մասնագետը:
Աշոտ ՀԱԿՈԲՅԱՆ
