Սյունիքի մարզի դատախազ Էդուարդ Հարությունյանը պատասխանել է Aravot.am-ի հարցերին։ Հաշվի առնելով հարցազրույցի ծավալը, այն ներկայացնում ենք հատվածաբար։
-Պարոն Հարությունյան, 2020թ. համեմատությամբ 2021թ.-ին Սյունիքի մարզում հանցավորության ի՞նչ ցուցանիշներ են գրանցվել։ Ի՞նչ բնույթի հանցագործություններն են շատացել։
-2021թ.-ին նախորդող տարվա համեմատ, Սյունիքի մարզում գրանցվել է հանցագործությունների որոշակի աճ: Նախորդող տարվա 744 դեպքի դիմաց 2021թ.-ին արձանագրվել է հանցագործությունների 896 դեպք, այսինքն՝ 152-ով կամ 20.4%-ով ավելի: Հարկ է նշել, որ առանձնապես ծանր հանցագործությունների դեպքերի քանակը նվազել է 5-ով (32-27): Կոնկրետ հանցատեսակների կատարման կտրուկ աճ տեղի չի ունեցել, որոշակիորեն ավելացել են մարդու եւ սեփականության դեմ ուղղված հանցագործությունները: Մարզում արձանագրվել է դիտավորությամբ առողջությանը ծանր վնաս պատճառելու, թմրամիջոցների ապօրինի շրջանառության հետ կապված, մահվան ելքով ճանապարհա-տրանսպորտային դեպքերի, ինչպես նաեւ կոռուպցիոն բնույթի հանցագործությունների նվազում:
Արձանագրվել է բնակարանային գողությունների դեպքերի աճ եւ դրանց բացահայտման ցուցանիշի նվազում: Այս տվյալները մտահոգիչ են, ինչի կապակցությամբ էլ մարզի դատախազության կողմից ձեռնարկվել են անհրաժեշտ միջոցներ:
Կարդացեք նաև
Դեռեւս 2021թ. փետրվարի 5-ին ՀՀ գլխավոր դատախազի հանձնարարությամբ մարզի դատախազության կողմից մարզի խոշորացված 8 համայնքների ղեկավարներին միջնորդագրեր են հասցեագրվել բազմաբնակարան շենքերի մուտքերը երկաթե դռներով եւ կոդավորված փականներով հագեցնելու, ինչպես նաեւ համայնքներում տեսախցիկներ տեղադրելու վերաբերյալ: Գործընթացի շրջանակներում համայնքի նախաձեռնությամբ միայն Կապան խոշորացված համայնքում տեղադրվել է 64 տեսախցիկ:
Արձանագրված հանցագործությունների բացահայտման ցուցանիշը նախորդող տարվա համեմատ նվազել է, սակայն հանցագործությունների թվի աճի ֆոնին պետք է փաստել, որ կա նաեւ որոշակի բարելավում: Հանցագործությունների թվի որոշակի աճի պատճառներից, թերեւս, կարող եմ հիշատակել ինչպես նախորդող տարվա վերջին տեղի ունեցած ռազմական գործողությունների ազդեցությունը մարզի բնակչության անձնային-հոգեբանական եւ սոցիալ-տնտեսական վիճակի վրա, այնպես էլ լատենտային հանցավորության դեմ անզիջում պայքարը: Մեծ ուշադրություն է դարձվում լատենտային հանցագործությունների հայտնաբերման, գրանցման, հաշվառման եւ ընթացք տալու հետ կապված միջոցառումների, մեթոդիկայի անընդհատ կատարելագործվող գործիքակազմի կիրառման վրա: Այս առումով գործադրվում են առավելագույն ջանքերը օբյեկտիվ իրականության մեջ գոյություն ունեցող հանցավոր դրսեւորումների եւ վարվող վիճակագրության համապատասխանությունը հնարավորիս ապահովելու ուղղությամբ:
-Սյունիքի որոշ բնակավայրեր մեկ օրում դարձան սահմանամերձ։ Այդ բնակավայրերի բնակիչների գույքի, քաղաքացիական անձանց նկատմամբ պարբերաբար ոտնձգություններ են կատարվում հակառակորդի կողմից: Նման դեպքերը քննության առնվո՞ւմ են, ունեք հարուցված քրեական գործեր:
– Ցանկացած ահազանգ, բնականաբար, պատշաճ դատավարական ընթացակարգով ենթարկվում է ստուգման: Կախված ահազանգի բովանդակությունից՝ դրանով զբաղվում են կամ զինվորական իրավապահ մարմինները, կամ քաղաքացիական համանուն մարմինները: Ահազանգերի ստուգմամբ որոշակի նյութական վնասի առկայությունը հաստատվելու (օրինակ՝ անասունների մոլորվելու եւ սահմանն անցնելու) դեպքում համապատասխան մարմինների (մարզպետարան եւ այլն) կողմից ձեռնարկվում են վնասի հատուցումն ապահովելու գործընթաց:
Ունենք նաեւ սպանության փորձի հատկանիշներով՝ 2021 թվականի հունվարի 19-ին Նռնաձոր բնակավայրի տարածքում զոհված անձանց աճյունների որոնողական աշխատանքների ընթացքում հակառակորդի կողմից տեղադրված ականի պայթյունից աշխատանքներն իրականացնող անձի մարմնական վնասվածքներ ստանալու դեպքի առթիվ հարուցված քրեական գործ:
Սյունիքի մարզի դատախազ Էդուարդ Հարությունյանի հետ հարցազրույցի շարունակությունը՝ առաջիկայում։
Արմեն ԴԱՎԹՅԱՆ
