«Իմ այցի ժամանակ դեռևս մոտ 2 շաբաթ էր, ինչ Ադրբեջանի զինված ուժերի կողմից սկսվել էր բարձրախոսներով հոգեբանական ճնշում գործադրելու գործընթացը: Խիստ մտահոգիչ էր այն իրավիճակը, որ տեսա այնտեղ»,-կառավարության նիստից հետո լրագրողների հետ տեղի ունեցած ճեպազրույցում ասաց ՀՀ Մարդու իրավունքների պաշտպան Քրիստինե Գրիգորյանը՝ անդրադառնալով Արցախ կատարած իր այցին, այնտեղ կատարած արձանագրումներին:
Ասաց, որ հանդիպել է Արցախի պաշտոնյաների հետ, եղել Խրամորթ գյուղում ու շփվել բնակիչների հետ:
«Խոսքը բնակչության հոգեբանական վիճակի մասին է: Այցից հետո ցավալիորեն ունեցանք շատ ավելի լուրջ զարգացումներ՝ ընդհուպ ինտենսիվ կրակոցներ, մեծ տրամաչափի զենքերից կրակոցներ ու նաեւ հետագայում գազի անջատման ու էլեկտրաէներգիայի անընդհատ ընդհատումների պայմաններում անտանելի հումանիտար իրավիճակ»,-ասաց Քրիստինե Գրիգորյանը:
Նրա խոսքով՝ ինքն այցելել է նաեւ Ստեփանակերտում գտնվող տեղահանված բնակիչների ժամանակավոր կացարան. «Զբաղվածության, սոցիալական ինտեգրման, երեխաների ադապտացման խնդիրները շատ էին»,- նշեց Գրիգորյանը: Ասաց նաեւ, որ կան բնակարանաշինության հետ կապված խնդիրներ, որոնք փորձում են լուծել Արցախի իշխանությունները՝ մեծածավալ բնակարանաշինության ծրագրերով:
Կարդացեք նաև
ՀՀ ՄԻ պաշտպանը նաեւ նշեց, որ Ադրբեջանի կողմից ճնշման, ահաբեկման, հայաթափման նպատակ հետապնդող քաղաքականությունը շարունակական է. «Այս ցուրտ եղանակային պայմաններում թույլ չտալ վթարի կամ, այսպես կոչված, «վթարի» հետեւանքները վերականգնելու… այս գործողությունները եւս մեկ ապացույց են, որ սա մեկ կետից կառավարվող քաղաքականություն է, նպատակը պարզ է՝ էթնիկ զտումն է Արցախի եւ հայաթափումն է»:
Հարցին՝ այդ ամենով հանդերձ, ինչպե՞ս է պատկերացնում Ադրբեջանի հետ խաղաղությունը, Քրիստինե Գրիգորյանը պատասխանեց, որ որեւէ Պաշտպան չի կարող ասել, որ խաղաղությունը վատ բան է. «Բայց, որպես պաշտպան՝ իմ կողմից խաղաղության խոսակցությունները, կամարտահայտման բարձրաձայնումները պիտի ապացուցված լինեն նաեւ գործողություններով: Առնվազն վերջին 2 շաբաթվա իրադարձությունները եւ էսկալացիաները, ներառյալ՝ հումանիտար իրավիճակի լարվածությունը, ցույց են տալիս, որ խաղաղության մասին խոսակցությունների համար ուղղակի միջավայր ու գործողություններ չկան: Դրանք, մեղմ ասած, ադրբեջանական կողմից անկեղծ չեն»:
Լուսինե ԲՈՒԴԱՂՅԱՆ
