Guardian-ի փոխանցմամբ, Լոնդոնի ազգային պատկերասրահը ֆրանսիացի իմպրեսիոնիստ Էդգար Դեգայի «Ռուս պարուհիներ» կտավը անվանափոխել է «Ուկրաինացի պարուհիների»:
Արամ Իսաբեկյան
Aravot.am-ի հետ զրույցում Հայաստանի գեղարվեստի ակադեմիայի ռեկտոր, ՀՀ ժողովրդական նկարիչ Արամ Իսաբեկյանն ասաց, որ շատ վատ է վերաբերվում նման երեւույթներին, երբ քաղաքականությունը խառնում են արվեստի հետ. «Շատ վատ է, ու կապ չունի՝ մեզ մոտ է, թե ուրիշների…Ցավոք, ամբողջ աշխարհը խառնվել է իրար: Քաղաքականության մեջ ես որեւէ դրական բան չեմ տեսնում, դրա պատճառով տուժում են եւ մարդիկ, եւ արվեստը»:
Փարավոն Միրզոյան
Հայաստանի ժողովրդական նկարիչ Փարավոն Միրզոյանը եւս անթույլատրելի է համարում այս քայլը. «Իմ կարծիքով դա անբարոյականություն է, որեւէ մեկն իրավունք չունի հեղինակի գործի հետ կապված որեւէ փոփոխություն անելու…Արդեն 150 տարի է անցել այդ կտավի ստեղծումից, ու հիմա վերցնել ու փոխելը թույլատրելի չէ»:
Արվեստի շուկայի փորձագետ Դմիտրի Բուտկեւիչը անդրադառնալով թեմային, գրել էր, որ Դեգան այն ժամանակ նկարել է Դյագիլեւյան ռուսական բալետի պարուհիներին, հետեւաբար ուկրաինուհիների մասին խոսք լինել չէր կարող:
Կարդացեք նաև
Ավելի վաղ ուկրաինացի նկարիչ Միրիամ Նայեմն էլ նամակներ էր գրել աշխարհի տարբեր երկրների թանգարանների, այդ թվում` Լոս Անջելեսի Գեթի, Նյու Յորքի Մետրոպոլիտեն թանգարաններ եւ Լոնդոնի ազգային պատկերասրահ, որտեղ ներկայացված են Դեգայի պարուհիները ու նշել, որ նրանք ուկրաինական հագուստներով են, նաեւ խնդրել էր անվանափոխել: Ու ահա առաջին դրական արձագանքը Լոնդոնից է ստացվել: Պատկերասրահի կայքում եւս փոփոխությունը կատարված է, 1917թ վախճանված Դեգան տեղյակ չէ, թե ինչ ճակատագրի են արժանանում իր գործերը:
Գոհար ՀԱԿՈԲՅԱՆ
