Մամուլում տեղեկություն էր շրջանառվում, ըստ որի՝ Ադրբեջանը դիմել է ռուսական կողմին՝ Դադիվանքում հայ հոգևորականներին ռուս հոգևորականներով փոխարինելու եւ Դադիվանքը Ռուս Ուղղափառ Եկեղեցու՝ Բաքվի և Ադրբեջանի թեմին հանձնելու վերաբերյալ: Թեմայի վերաբերյալ Aravot.am-ը մեկնաբանություն խնդրեց Մայր Աթոռ Սուրբ Էջմիածնի Միջեկեղեցական հարաբերությունների բաժնի տնօրեն Տ․ Շահե ծայրագույն վարդապետ Անանյանից։
«Մենք չենք բացառում սույն տեղեկատվության հավաստիությունը: Այսուհանդերձ չպետք է մոռանալ, որ Դադիվանքում հայ հոգևորականների ծառայությունը հնարավոր է դարձել բացառապես Մոսկվայի և համայն Ռուսիո Կիրիլ Ա Պատրիարքի միջնորդական ջանքերի և Ռուսաստանի Դաշնության նախագահի անմիջական միջամտության շնորհիվ: Միաժամանակ տեսել ենք Ռուս Ուղղափառ Եկեղեցու հստակ կեցվածքը եկեղեցական, կանոնական հիմնարար սկզբունքներում, որն արտահայտվել է նաև Լեռնային Ղարաբաղի հակամարտության խաղաղ կարգավորմանն ուղղված հոգևոր պետերի եռակողմ բազմաթիվ հանդիպումների ընթացքում»,-Aravot.am-ին ասաց հայր Շահեն։
Ավելի վաղ թեմային անդրադարձել էր նաեւ Արցախի թեմի առաջնորդ Վրթանես եպիսկոպոս Աբրահամյանը: Սրբազանն ասել էր, որ ադրբեջանցիները փորձում են ամեն ինչ անել Դադիվանքի վրա լիակատար վերահսկողություն սահմանելու համար: Եվ ինքը կարծում է, որ ադրբեջանական կողմը նման մտածումներ ունեցել է:
Գոհար ՀԱԿՈԲՅԱՆ
