Aravot.am-ը Արցախի թեմի առաջնորդ Վրթանես եպիսկոպոս Աբրահամյանից մեկնաբանություն խնդրեց մամուլում եղած այն տեղեկության վերաբերյալ, ըստ որի` Ադրբեջանը ռուսական կողմին առաջարկել է Դադիվանքում հայ հոգևորականներին փոխարինել Մոսկվայի պատրիարքարանի՝ Բաքվի Ռուս ուղղափառ եկեղեցու հոգեւորականներով։
Տեր Վրթանես եպիսկոպոս Աբրահամյան
«Չեմ կարծում, որ ադրբեջանցիները նման քայլի չեն գնա, կգնան, նման քայլերն իրենց համար ընկալելի են: Դրանով իրենք ուզում են ամեն ինչ անել, որպեսզի Դադիվանքն անցնի իրենց լիարժեք վերահսկողության տակ: Եվ այս հարցով իրենց համար ընկալելի են հնարավոր բոլոր քայլերը, որոնք չեմ կարծում, թե ընկալելի կլինեն ռուս ուղղափառ եկեղեցու համար»,-ասաց Արցախի թեմի առաջնորդը:
Վրթանես սրբազանի խոսքով. «Ռուս ուղղափառ եկեղեցու կողմից, որը մեր ավանդական եւ հազարավոր տարիներ քույր եկեղեցին է, նման քայլի գնալը կնշանակի, որ լուրջ բաներ են ստեղծվում երկու եկեղեցիների միջեւ: Այնպես որ՝ չեմ կարծում, թե նման քայլ կլինի: Մյուս կողմից՝ համոզված եմ, որ ադրբեջանական կողմը նման մտածումներ ունեցել է»:
Գոհար ՀԱԿՈԲՅԱՆ
