«Բուուոււու»-ձայնարկությամբ, «Զարեհ դավաճան», «Նիկոլ դավաճան», «Արցախը Հայաստան է». այսպիսի վանկարկումներով եւ պաստառներով են ԱՄՆ Լոս Անջելես քաղաքում դիմավորել Սփյուռքի գործերի գլխավոր հանձնակատար Զարեհ Սինանյանին: Նա արագ լքեց հանդիպման սրահը:
Հիշեցնենք, Զարեհ Սինանյանն այս օրերին աշխատանքային այցով գտնվում է ԱՄՆ-ում:
Թե ինչպե՞ս են Սփյուռքի գործերի գլխավոր հանձնակատարին դիմավորում Լոս Անջելեսում՝ տեսանյութ է հրապարակել «Լուսաբան» տելեգրամյան ալիքը:
Զարեհ Սինանյանի հանդիպումը նախատեսված էր տեղի հայերից մեկին պատկանող ռեստորանի դահլիճում: Զարեհ Սինանյանի՝ հանդիպման սրահ մտնելուն պես վանկարկումները սկսում են: Ռեստորանի տերը հավաքվածներին հորդորում է լռել, հավուր պատշաճի հյուրին ընդունել, ասում է, որ կատարվողը ինքը կընդունի իբրեւ իր նկատմամբ անհարգալից վերաբերմունք, բայց կրքերը չեն հանդարտվում:
Կարդացեք նաև
Ինչ-որ մի պահի քաշքշուկ է սկսվում հավաքվածների եւ ռեստորանի տիրոջ ու նրան ուղեկցողների միջեւ:
Ցուցարարները նաեւ երգում են «Զարթիր լաո»-ն:
Տեւական ժամանակ վիճաբանությունից հետո, ռեստորանի տերը հավաքվածներին դուրս է հրավիրում՝ բոլորին հեգնական շնորհակալություններ հայտնելով:
Հանդիպման սրահը դատարկվեց. ներսում մնացին միայն ռեստորանի տերը՝ իր մի քանի համակիրներով եւ աշխատակիցներով: Ցույցը շարունակվեց նաեւ դրսում: Հավաքվածները «սյունյաց ողջույններ» հղեցին վարչապետ Նիկոլ Փաշինյանին: Ցուցարարները պնդեցին, որ եթե Զարեհ Սինանյանը խոսելու է, իրենք մի քանի հարց կցանկանային նրան տալ: Հանդիպման կազմակերպիչներից մեկը հայտարարեց, որ հանդիպումը վերջացավ, հանդիպում չի կայանալու:
Ցուցարարներից այս կինն էլ ասում էր, որ ինքը եկել էր այս հանդիպմանը՝ տեսնելու այն իշխանության դեմքը, որի ձեռքերը թաթախված են 5 000 զոհերի արյան մեջ, եւ հասկանալու, թե ինչո՞ւ են նրանք շարունակում կառչած մնալ իրենց աթոռներից՝ «թուրքին էլի բա՞ն ունեն տալու»: Ցուցարարները հայտարարեցին, որ որեւէ դավաճան, թե հայրենիքում, թե Սփյուռքում հանգիստ կյանք չի ունենալու՝ կոչ անելով Սփյուռքի բոլոր համայնքներին՝ նման ընդունելության արժանացնել ՀՀ գործող իշխանությունների ներկայացուցիչներին:
Նելլի ԳՐԻԳՈՐՅԱՆ
