«Ժառանգություն» կուսակցության հիմնադիր, ՀՀ առաջին արտգործնախարար Րաֆֆի Հովհաննիսյանը թոռան մկրտությանը մասնակցելու նպատակով իր՝ Արցախ մտնելու արգելքը համարում է մի անգամվա թյուրիմացություն:
Հիշեցնենք, որ օգոստոսի 1-ին ռուս խաղաղապահները թույլ չէին տվել Րաֆֆի Հովհաննիսյանին մտնել Արցախ:
«Հույս ունեմ, որ մինչեւ սեպտեմբերի 1-ը, այսինքն՝ Արցախի պետական տոնի նախօրեին Արցախի Հանրապետության իշխանությունը, գեներալ-մայոր Վոլկովը, ազգային անվտանգության ծառայությունը կվերականգնեն իրենց ինքնիշխանությունը, լիազորությունը եւ արժանապատվությունը եւ նաեւ ՀՀ-ի իմ բացառիկ իրավունքը՝ լինելու Արցախի տարածքում եւ մասնակցելու, ինչպես ամեն տարի, Արցախի Հանրապետության հռչակման տոնակատարությանը»,- ասաց պարոն Հովհաննիսյանը:
Ըստ նրա, կարեւոր չէ, թե այդ մեկ որոշման աղբյուրը գալիս է Բաքվում նստած ռազմական հանցագործի՞ց, թե՞ Երեւանում թաքնված նախկին գերագույն հրամանատարից, որը թիրախավորել է մի ընտանեկան մկրտության արարողություն. «Սրա տիրույթը գեներալ-մայորն է, Արցախի Հանրապետության տակավին ինքնիշխան պետականությունն ու ՀՀ պատկան մարմինը: Դրանցից որեւէ մեկը պիտի չասի, որ ես մեկնաբանություն չունեմ: Մի կողմ դնենք, որ սա նախկին արտգործնախարար է՝ Արցախի, Հայաստանի ինքնիշխանության, պետականության իմ ինքնակշիռը, հաշվեկշիռը իմ եւ Աստծո միջեւ է, դա հրապարակման ենթակա չէ: Բայց, որպես ՀՀ քաղաքացի, որպես հայ մարդ իմ բացառիկ իրավունքն է լինել մեր հայրենիքում՝ Արցախի Հանրապետությունում: Ես թաքնվելու խնդիր չունեմ եւ սեպտեմբերի 1-ին ակնկալում եմ, որ Աղավնոն իր տեղը կլինի, միջանցքը իր տեղը կլինի եւ Արցախի Հանրապետության բարձրագույն իշխանությունը, գեներալ-մայորը վերականգնած կլինեն իմ բացառիկ իրավունքը»:
Կարդացեք նաև
Հռիփսիմե ՋԵԲԵՋՅԱՆ
