STARMUS-ի շրջանակում Հայաստան այցելած հայտնի արտիստների թվում է նաեւ Անդրեյ Մակարեւիչը: Լրագրողների հետ հանդիպման ժամանակ նա բացառիկ հետաքրքիր է որակել գիտության եւ արվեստի STARMUS փառատոնը. «Ոչ ոք նման բան դեռ չի արել: Եղել են երաժշտության մեծաթիվ փառատոներ, գուցե որոշները լավ, որոշները ոչ այնքան, բայց բոլորն էլ նման են եղել իրար: Բազմաթիվ գիտական հանդիպումներ էլ են եղել: Եվ որպես կանոն՝ նեղ մասնագետների շրջանակի համար: Ես այստեղ ցնցված էի այն բանից, որ գիտնականների դասախոսությունների ժամանակ ահռելի թվով մարդիկ էին ներկա»:
Նա Երեւանը որակել է աշխարհի հնագույն երկրներից մեկի հնագույն մայրաքաղաք:
Մակարեւիչը եղել է նաեւ Էրեբունի պատմահնագիտական արգելոց-թանգարանում, ինչի վերաբերյալ ասաց, որ մեղք կլիներ այնտեղ չայցելելը:
Խոսելով իր` Իսրայել տեղափոխվելու մասին, նշեց, որ իրեն դուր է գալիս այնտեղ ապրելը, որտեղ ծնվել է նաեւ որդին:
Կարդացեք նաև
Ինչ վերաբերվում է իր` արտասահմանյան գործակալ «կարգավիճակին», այս մասին էլ Մակարեւիչն ասել է, որ նման քայլերով իշխանությունները ցանկանում են ստորացնել մարդկանց, ինքն էլ առանձնապես ցնցումների մեջ չի ընկնում այդ կարգավիճակից:
Մակարեւիչը Հայաստան տեղափոխված իր բոլոր հայրենակիցներին հաջողություն մաղթեց, նաեւ հաջողություն մաղթեց բոլոր նորմալ մարդկանց, որոնք մնացել են հայրենիքում. «Ի վերջո, ցանկացած խելահեղություն մի օր ավարտվում է, չի կարող անվերջ ձգվել»:
Գոհար ՀԱԿՈԲՅԱՆ