2022թ STARMUS-ի շրջանակում Հայաստան այցելած հայտնի արտիստների թվում էր նաեւ «Մաշինա վրեմենի» ռոք-խմբի հիմնադիր, ղեկավար եւ երգերի հեղինակ Անդրեյ Մակարեւիչը, որի անունը ՌԴ իշխանությունները ներառել են օտարերկրյա գործակալների ցանկում:
Լեգենդար արտիստը կրկին Երեւան կժամանի իր խմբով՝ այս անգամ կենդանի հնչողությամբ համերգի համար, որը կկայանա ապրիլի 13-ին «Կարեն Դեմիրճյան» մարզահամերգային համալիրում: Իսկ առաջին անգամ 1990 թվականին էր համերգներով «Մաշինա վրեմենին» հանդես եկել Կարեն Դեմիրճյան մարզահամերգային համալիրում:
Մակարեւիչը փոքրիկ հարցազրույց է տվել Aravot.am-ին:
Կարդացեք նաև
-Ձեր խմբի երկրպագուներն անհամբերությամբ են սպասում համերգին, որի առիթով շատ ուրախ ենք: Ինչո՞ւ, այնուամենայնիվ, որոշեցիք խմբի հիմնադրման 55-ամյակը տոնել հենց Հայաստանում:
– Մենք ծրագրել էինք անցյալ տարի աշնանը համերգ ունենալ Հայաստանում, սակայն այն հետաձգվեց: Եվ երբ կազմակերպիչներն առաջարկեցին համերգի համար նոր օր ընտրել ապրիլի մեջ, որոշեցինք, որ դա անպայման լինի ապրիլի 13-ին, քանի որ այդ օրը մեր Սաշկա Կուտիկովի (խմբի անդամ Ալեքսանդր Կուտիկովի-Գ.Հ.) ծննդյան օրն է, նաեւ ռոքնռոլի միջազգային օրը; Այսինքն, երկու հրաշալի առիթ՝ համերգային տուրը Հայաստանում սկսելու համար:
-Ի՞նչ ակնկալի հայաստանցի ունկնդիրը այս բացառիկ համերգից:
-Նրանք, ովքեր սիրում են մեր հին երգերը, կարող են նորից վայելել դրանք՝ երկարատեւ դադարից հետո: Նրանք, ում հետաքրքրում է այսօրվա «Մաշինա վրեմենին», առաջին անգամ հնարավորություն կունենան մեր վերջին ալբոմներում ընդգրկված երգերը գնահատել կենդանի հնչողությամբ: Դրանք մենք Հայաստանում դեռ չենք կատարել: Կարծում եմ՝ բոլորի համարն էլ հետաքրքիր կլինի:
– Այժմ Հայաստանում մեծ թվով ՌԴ քաղաքացիներ են ապրում հայտնի պատճառներով, ի՞նչ ուղերձ եք ցանկանում փոխանցել նրանց:
-Մենք ուղղակի կնայենք միմյանց, որովհետեւ վաղուց չենք տեսնվել…
– Ձեր ո՞ր ստեղծագործությունը կլինի այս համերգի այցեքարտը:
-Եթե նկատի ունեք մեր հին երգերը, ապա շատ բան կնվագենք, իհարկե ոչ ամբողջը…
-Ի՞նչ կմաղթեք խելահեղ աշխարհում ապրող մարդկանց, հատկապես որ աշխարհի տարբեր անկյուններում այժմ մոլեգնում են պատերազմները:
– Բավական է արդեն, խաղաղություն եւ հանգստության կարիք ունենք բոլորս…
Զրուցեց Գոհար ՀԱԿՈԲՅԱՆԸ
