«Ընտրական օրենսգրքի» համաձայն, ընտրատարածքային ընտրական հանձնաժողովները քվեարկության օրվանից հետո՝ 7-րդ օրը, ամփոփում են համայնքների ավագանու անդամների ընտրությունների արդյունքները։ Վայոց Ձորի մարզի թիվ 34 ընտրական հանձնաժողովն ամփոփել է մարզի երկու համայնքում սեպտեմբերի 25-ին կայացած ընտրության արդյունքները։
Հանձնաժողովի որոշմամբ Եղեգիս համայնքի ավագանու անդամի 9 մանդատները հատկացվել են «Քաղաքացիական պայմանագիր» կուսակցությանը, իսկ 6 մանդատ՝ «Ազատական» կուսակցությանը։ Հիշեցնենք, որ Եղեգիսում առաջադրվել էր նաեւ «Վերելք» կուսակցությունը, որին կողմ է քվեարկել 45 ընտրող։ 4648 ընտրողի քվեարկությանը մասնակցել էր 2814 մարդ, 14 քվեաթերթիկ անվավեր էր։ «Քաղաքացիական պայմանագիրը» ստացել է 1592 քվե, իսկ «Ազատականը»՝ 1162 ։
Վայոց Ձորի մարզի Արենի համայնքում առաջադրվել էր երկու կուսակցություն՝ «Հանրապետություն»-ը եւ «Քաղաքացիական պայմանագիրը»։ 15 մանդատից 13-ը բաժին է ընկել կառավարող ուժին, իսկ 2 մանդատ՝ «Հանրապետությանը»։ Այս համայնքում 8206 ընտրողից սեպտեմբերի 25-ին կայացած քվեարկությանը մասնակցել է 3688-ը։ 3281 ընտրող քվեարկել է «Քաղաքացիական պայմանագրի» օգտին, 388-ը՝ «Հանրապետության», 19 քվեաթերթիկ անվավեր էր։
Մինչեւ հոկտեմբերի 5-ը թեկնածուները կարող են ներկայացնել ինքնաբացարկի դիմումներ, որից հետո ընտրատարածքային ընտրական հանձնաժողովները կկազմեն արձանագրություն ավագանու ընտրված անդամներ գրանցելու մասին եւ կհանձնեն մանդատները։
Կարդացեք նաև
Արմեն ԴԱՎԹՅԱՆ
