«Ձեր նախարարության բյուջետային ծրագրերը հիմնականում աչքի են ընկնում արդյունքային չափորոշիչների բացակայությամբ: Օրինակ, 11.19 ծրագիրը, որը երեւի ձեր ամենամեծ ծրագիրն է, 2022-ին դրա համար հատկացվել է 5,2 մլրդ դրամ, այս տարվա համար 6,85 մլրդ դրամ ու դրա դիմաց 0 արդյունքի չափորոշիչ կա: Ի՞նչ տրամաբանությամբ եք ներկայացրել այս հայտը ու ի՞նչ տրամաբանությամբ է ֆիննախը սրան հավանություն տվել: Խորհրդարանը ի՞նչ տրամաբանությամբ պետք է սրան հավանություն տա՞»,- այսօր ԱԺ-ում 2023-ի պետբյուջեի քննարկման ժամանակ ԱԺ ֆինանսավարկային եւ բյուջետային հարցերի հանձնաժողովի նախագահ Գեւորգ Պապոյանը նկատողություն արեց բարձր տեխնոլոգիական արդյունաբերության նախարար Ռոբերտ Խաչատրյանին:
Նա ժամանակ խնդրեց՝ թվերը բացելու համար, հետ ասաց, որ դա ռազմարդյունաբերությանն է վերաբերում, գաղտնի տվյալներ են, դրա համար էլ չեն գրել: Նախարարության աշխատակիցներից մեկը փորձեց տեղից հուշել, Պապոյանը բարկացավ. «Ի՞նչ 10 մլրդ, կներեք, որ ձեզ ձայն տամ, կպատասխանեք տեղից»:
Պապոյանը հարցրեց նաեւ. «Կիբերանվտանգության, ինովացիոն տեխնոլոգիաների, կապի, փոստի, համացանցի եւ տիեզերական ծրագրերի համակարգում, պետական քաղաքականության մշակում՝ այստեղ դառնում է հատկացումը 1 մլրդ-ից ավելի: Ոչ մի կոնկրետ չափորոշիչ չկա, միայն 90% կատարման չափանիշ է նվազագույնը, ի՞նչ ենք անում: Ես անցած անգամ կոռեկտ էի այս հարցերը տալիս, մի քիչ ավելի նուրբ էի տալիս, դրա համար, ոնց որ անցած անգամ էր, նույն ձեւով եկել է այս տարի»:
Նախարարը պատասխանեց, որ դա նախարարության պահպանման ծախսն է աշխատողների աշխատավարձն է դրա մեջ մտնում, ու դժվար է ասել՝ ի՞նչ չափորոշիչ պետք էր դնել:
Կարդացեք նաև
Պապոյանը դժգոհեց նաեւ, որ ռադիոկապի կարգավորման կամ կանոնակարգման գծով աշխատանքի իրականացման տողում նշված է հատաքանակ. «Ծրագրային բյուջետավորման մեջ «հատ» չպետք է լինի, պետք է լինի՝ ինչ արդյունք է լինելու: Ես խնդրում եմ, որ արդյունքային ցուցանիշները լինեն իրապես որակական, չլինեն հատ, կմ»: Նախարարը բացատրեց, որ հայտերը հաշվում են քանակով: Իսկ արդյունքները մեկ օրվա մեջ չեն երեւում, երկարաժամկետ կտրվածքով են երեւում:
Հռիփսիմե ՋԵԲԵՋՅԱՆ
