Անհետ կորած ու զոհված զինծառայողների հարազատները նոյեմբերի 23-ին բողոքի ցույց են անում Հայաստանում Ռուսաստանի դեսպանատան դիմաց, ինչի պատճառով փակ են Գ. Լուսավորիչ-Զաքյան փողոցները: Նրանք տեղեկություն ունեն, որ ՀԱՊԿ գագաթաժողովին մասնակցելու նպատակով Հայաստան ժամանած ՌԴ նախագահ Վլադիմիր Պուտինի ավտոշարասյունը հենց այդ՝ Գ.Լուսավորիչ փողոցով է շարժվելու դեպի «Դվին» հյուրանոց, որտեղ և ընթանում է գագաթաժողովը:
Անհետ կորած ու զոհված զինծառայողների հարազատները Ռուսաստանի նախագահից պահանջում են վերադարձնել իրենց գերեվարված, անհետ կորած որդիներին: Ցույցի մասնակիցների պաստառների վրա հայերենով, ռուսերենով ու անգլերենով գրված են «Պուտին, վերադարձրու մեր տղաներին», «Թույլ մի տվեք Հայաստանի և Ռուսաստանի միջև եղբայրության փլուզում», «Վերադարձրեք հայ գերիներին Ադրբեջանից», «Անհետ կորածները Ալիևի ձեռքին պատանդ են», «Նոյեմբերի 9-ի հայտարարության 8-րդ հետը չի կատարվում, միջոցներ ձեռնարկեք», «Վլադիմիր Վլադիմիրովիչ, օգնեք վերադարձնենք մեր երեխաներին»:
Զոհված զինծառայողի հարազատներից Արսեն Ղուկասյանը լրագրողների հետ զրույցում ասաց, որ իրենց պահանջն է անհապաղ պարզել անհետ կորած տղաների կարգավիճակը և վերադարձնել: «Մենք արդեն երեք օր պատրաստվում էիք Պուտինի այցին: Քանի որ նոյեմբերի 9-ի հայտարարության երրորդ կողմը Ռուսաստանն է հանդիսացել և 8-րդ կետը մինչ օրս չի կատարվել, մեր պահանջն է, որ ինքը լինի հետևողական, բոլոր լծակներն օգտագործի մեր երեխեքի վերադարձի հարցում: Մենք մի քանի օր առաջ նամակ ենք ուղարկել Պուտինի աշխատակազմ, որ իր այցի ընթացքում գտնի ժամանակ և 3-4 ծնողի հետ հանդիպի, անմիջապես մեր խոսքը լսի: Արձագանքել են, որ նամակն ուղղված է ՌԴ արտգործնախարարություն, մեզ կտեղեկացնեն»: Նա ավելացրեց, որ իրենց պահանջն ուղղված է առհասարակ միջազգային բոլոր կառույցների և պետությունների ղեկավարներին, ովքեր կկարողանան օգնել վերադարձնել իրենց զավակներին:
Տեղեկացնենք, անհետ կորած ու զոհված զինծառայողների հարազատները բողոքի ցույցը սկսել էին ավելի վաղ՝ Հանրապետության հրապարակում, հետո քայլերթով շարժվել դեպի Ռուսաստանի դեսպանություն:
Կարդացեք նաև
Լուսինե ՄԱՐԳԱՐՅԱՆ
