Ինչպես տեղեկացրել ենք, այսօր կառավարության շենքի մոտ կամավորականները բողոքի ցույց էին կազմակերպել՝ պահանջելով իրենց աշխատավարձերը տալ: Նրանք վստահեցնում էին, որ դիրքերից իջնում են ու չեն ստանում հասանելիք 8500 դրամները, բացի այդ, զինվորականների 80%-ն ունի բնակարանային խնդիր:
Կառավարությունում քննարկումից հետո «Խաչակիրների» ջոկատի հրամանատար Սարգիս Պողոսյանը լրագրողների հետ զրույցում ասաց, որ 7 հարց են ներկայացրել՝ աշխատավարձերի, բնակարանների, զորացրման, առողջապահական, համազգեստի եւ այլ ռազմական խնդիրներ, որոնք գաղտնիություն ունեն: Այդ հարցերի պատասխանները խոստացել են 1 շաբաթվա ընթացքում տալ իրենց. «Տների հարցը, աշխատավարձերի հարցը, որ մենք բարձրացրել ենք, մենակ խաչակիրներին չի վերաբերվում: Թող մնացած ջոկատներից էլ մասնակցեն, ես սիրում եմ, որ տղեն հայ ա մնում, ոչ թե իրան կապիկի պես ա պահում: Եթե լավ տղա ես, ուզում ես հարցերդ լուծես, արի լուծի, մենք ձեր հարցերը լուծող չենք: 10 անգամ եթերներից ասեցինք ձեզ ձիգ պահեք, աթոռի կռի՞վ եք անում, թե՞ մի հատ բիզնեսի կռիվ եք անում: Մեկը ասում ա՝ պետական աշխատող եմ, մեկն ասում ա՝ ինձ պաշտոն են տալու, կամերայի դեմը չերեւամ…Որ պաշտոն տան, առավոտից իրիկուն կամերայի դեմը ցցված ես լինելու՝ ա՛յ տղա»:
Ազատամարտիկ Արթուր Այվազյանը՝ Մանախը ասաց, որ իրենք են առաջարկել 7-օրյա ժամկետում վերջնական պատասխան տալ. «Հույս ունեմ խելացի կգտնվեն լուծումներ տալ, իսկ եթե ուղեղները չի հասնի, առաջարկել ենք մեր միտքը փոխանցել»:
Կարդացեք նաև
Կամավորականները բողոքել են, որ փորձառու զինվորականների փորձը հաշվի չեն առնում. «Այս մարդիկ հայրենիքի համար կյանք են դրել, դո՞ւք եք որոշում բանակի խնդիրները՝ բանակում չծառայածներով, բանակից թռածներով, թուրքի տակ պառկողներով»: Արթուր Այվազյանը վստահեցրեց, որ իրենց ձեռքի տակ 30-40 դեպք կա, երբ դիրքերից իջած կամավորականին հատկացված 8500 դրամը չեն տվել, չնայած բյուջեից գումարը դուրս է գրվել: Անհետացել է ինչ-որ օղակում:
Հռիփսիմե ՋԵԲԵՋՅԱՆ
