Սկանդալային փսեւդո կամ ոչ փսեւդո հրապարակումը կա, որ ՆԳ նախարարությունը իշխանության մարդու հետ փոխկապակցված մարդու է տվել ավտոմեքենաների ապահովագրությունը: Կառավարության այսօրվա նիստում Նիկոլ Փաշինյանը հարց ուղղեց ՆԳ նախարար Վահե Ղազարյանին` խնդրելով պարզաբանել իրավիճակը:
ՆԳ նախարար Վահե Ղազարյանը (լուսանկարում) նշեց, որ ոստիկանության ավտոմեքենաների ապահովագրության ծառայության ձեռքբերումն իրականացվել է ՀՀ կառավարության որոշմամբ՝ մեկ անձից գնում կատարելու եղանակով:
«ՆԳՆ-ից պաշտոնական հարցումներ են կատարվել ապահովագրական ընկերություններին, և ստացված պատասխանների համաձայն՝ ամենամատչելի առաջարկը ներկայացրել է «ՍԻԼ ինշուրանս» ընկերությունը: Մասնավորապես, ԿԱՍԿՈ ապահովագրության համար «Նաիրի ինշուրանսը» ներկայացրել է ավտոմեքենաների արժեքի 2,8 տոկոս, «Արմենիա ինշուրանսը»՝ 5,5 տոկոս, «ՍԻԼ ինշուրանսը»՝ 1,7 տոկոս, «Ինգո Արմենիան»՝ «Շկոդա» մեքենաների համար 7 տոկոս, «Տոյոտա» ավտոմեքենաների համար՝ 2,4 տոկոս, «ՌԵՍՈ» ընկերությունը՝ 3,2 տոկոս, «Ռոսգոսստրախը»՝ 2,5 տոկոս: ԱՊՊԱ տեսակի ապահովագրության համար «ՍԻԼ ինշուրանսը» 2,5 մլն դրամով ավելի ցածր գին է առաջարկել, քան մյուս ընկերությունները, այդ պատճառով իրենց հետ ենք կնքել պայմանագիրը»,-ասաց ՆԳ նախարարը:
Նիկոլ Փաշինյանն իր հերթին պարզաբանեց ՆԳ նախարարի պարզաբանածը. «Պարեկային ծառայության մեքենաները բավական հաճախ վթարվում են, և, ցավոք, լինում են դեպքեր, երբ մեղավորը պարեկային ոստիկանն է: Այդ պայմաններում տեսանք, որ կա անհրաժեշտություն ԿԱՍԿՈ ապահովագրություն իրականացնել: Դրա էությունն այն է, որ կապ չունի՝ ով է մեղավոր, մեքենան ապահովագրական ընկերության միջոցներով վերականգնվում է: Այս դեպքում որոշումն այն մասին է, որ մեկ անձից գնում կարելի է անել, բայց պարտադիր կերպով ընկերություններին ուղարկվում է հարցում, ասում ենք՝ մենք էսպիսի ծառայություն ենք ուզում, ով ինչ գին է առաջարկում»,-ասաց Փաշինյանը:
Կարդացեք նաև
Հիշեցնենք, որ «ՍԻԼ ինշուրանս» ընկերության սեփականատերը ԱԺ ՔՊ խմբակցության պատգամավոր Խաչատուր Սուքիասյանն է:
Լուսինե ՄԱՐԳԱՐՅԱՆ
