Այսօր ԱԺ էին այցելել Աշոտ Նավասարդյանի անվան թիվ 196 դպրոցի աշակերտներն ու ուսուցիչները, օթյակից հետեւում էին նիստին:
Գեղամ Մանուկյան
«Հայաստան» խմբակցության պատգամավոր Գեղամ Մանուկյանը, դիմելով նրանց՝ ասաց. «Դուք կրում եք մի մարդու անուն ձեր դպրոցում, որն իր ամբողջ գիտակից կյանքում պայքարեց անկախության, պետականության համար: Այս օրերին այս դահլիճում հաճախ լսում եք խաղաղության դարաշրջան արտահայտությունը: Մի քիչ եթե ուսումնասիրեք Աշոտ Նավասարդյանի գործունեությունը, կտեսնեք, որ նրանց պատկերացմամբ խաղաղությունը չեն մուրում, թշնամու ամեն հարձակումից հետո պետական պաշտոնյաները թութակի պես չեն կրկնում՝ խաղաղություն: Խաղաղության համար պետք է ուղեղով աշխատել, պետք է չսողալ»:
Վահագն Ալեքսանյան
Հետո ՔՊ-ի հերթն էր: Վահագն Ալեքսանյանը, դիմելով աշակերտներին, ասաց. «Դուք վստահաբար սովոր եք լսել մարդկանց, ովքեր սիրում են իրենց ձեռքերը տաքացնել ուրիշների թափած արյան վրա: Դուք վստահաբար շատ կլսեք մարդկանց, ովքեր քարկոծում են խաղաղությունը, բայց դրա հետ մեկտեղ հարստացել են բանակի հաշվին: Շատ կլսեք մարդկանց, ովքեր փաստաբաններն են իրենց այն շեֆերի, որոնք ծակ գրպանով եկել են Երեւան, բայց հիմա դոլարային միլիոնատերեր են»:
Նիստերի դահլիճից Ասպրամ Կրպեյանը բղավեց՝ դատե՛ք: Ալեքսանյանը արձագանքեց. «Դատում ենք, շատ ենք դատում, օրական 4-5 հայցադիմում է գնում դատարան՝ ձեր թիմակիցների ապօրինի գույքի հետ կապված: Պարոն Արծվիկ Մինասյան, դուք նախարար եք եղել, ձեր վարչապետն եղել է Հովիկ Աբրահամյանը, ո՞նց կգնահատեք Հովիկ Աբրահամյանի տունը, ձեր ճաշակո՞վ է»:
Կարդացեք նաև
Սա հունից հանեց «Հայաստան» խմբակցության պատգամավոր Գեղամ Նազարյանին, նա սկսեց տեղից գոռալ՝ «Ո՞վ է հիմա առել Հովիկ Աբրահամյանի տունը, էդ մասին ասա, թող երեխեքն էլ լսեն»: Ալեքսանյանը պատասխանեց. «Ինչքանով ես եմ տեղյակ, պատկանում է մի մարդու, ով երբեք քաղաքական պաշտոն չի զբաղեցրել, ՀՀ ոչ վարչապետ է եղել, ոչ նախարար է եղել, այդքանը հերիք է: Սիրելի՛ աշակերտներ, երբ որ տեսնում եք, որ որեւէ պետական պաշտոնյա հղփանում է այնքան, որ ոսկեզօծ պատերի մեջ է ապրում, արեք այն, ինչ պետք է անեք»:
Նիստը վարող ԱԺ փոխխոսնակ Հակոբ Արշակյանը նկատողություն արեց ու զրկեց այս նիստի ընթացքում Գեղամ Նազարյանին ձայնի իրավունքից:
Ասպրամ Կրպեյանը նույնպես զրկվեց ձայնի իրավունքից ու ստացավ սպառնալիք՝ այնպես արեք, որ այլ սանկցիաներ չկիրառվեն:
Հռիփսիմե ՋԵԲԵՋՅԱՆ
Հովիկ Աբրահամյանի տան լուսանկարը՝ «Հետքի»
