Օրերս Խ. Աբովյանի անվան Հայկական պետական մանկավարժական համալսարանի Կուլտուրայի ֆակուլտետում տեղի ունեցավ նույն համալսարանի ուսանողուհի Ռուզաննա Մարգարյանի « Ձեռքդ դի´ր սրտիդ, ես այնտեղ եմ» գրքի շնորհանդեսը:
Գիրքը նվիրված էր 44-օրյա պատերազմում իրենց կյանքը հանուն հայրենիքի զոհած հերոսների հիշատակին:
Միջոցառմանը ներկա էին զոհվածների հարազատները, պատերազմի մասնակիցները, ուսանողադասախոսական անձնակազմը և գրքի հեղինակի ընկերները:
Կարդացեք նաև
Շնորհանդեսի բացումը կատարվեց պատերազմին նվիրված երգով, իսկ հետո հեղինակը սեղմ ներկայացրեց գրքի բովանդակությունը, խոսեց այն գրելու ընթացքում ունեցած դժվարությունների, գիրքը գրելու ցանկության, մտահղացման մասին:
Նշեց,որ գրքում ընդգրկել է պատմություններ զոհվածների մասին,որոնք նա լսել է զինվորների ծնողների, հարազատների հետ զրույցներից:
Ռուզաննան իր խոսքում ընդգծեց. «Հայի ճակատին հավերժ փորագրված է պայքարը: Պայքարել ամեն ինչի դեմ`ցավի, տառապանքի, նույնիսկ ինքներս մեր դեմ: Պայքարել և երբեք չհանձնվել,այս է մեր խորագիրը»:
Կարճ ելույթներով հանդես եկան նաեւ պատերազմի մասնակիցները:
Շնորհանդեսի ավարտին Ռուզաննան գրքերից մի քանիսը նվիրեց զոհվածների հարազատներին և պատերազմի մասնակիցներին:
Նատալի ՄԻՆԱՍՅԱՆ