Այս հանքանյութը մեզ անհրաժեշտ է ծնված օրվանից մինչև խոր ծերություն։ Մանուկ հասակում այն հարկավոր է ոսկորների ու ատամների ձևավորման, կանոնավոր աճի ու զարգացման համար, դեռահասության շրջանում այն օրգանիզմի նորմալ զարգացման նախապայմաններից մեկն է, իսկ այնուհետև անհրաժեշտ է ոսկորների և ատամների ամրության պահպանման համար։ Այս ամենից զատ այն մի շարք այլ կարևոր գործառույթներ ունի, օրինակ՝ պայքարում է ճարպակալման դեմ, նպաստում հաստ աղիքի քաղցկեղի կանխարգելմանը և այլն։
Ինչո՞ւ է կալցիումը համարվում առողջության «շինանյութ»
1․ Այն ամրացնում է ոսկորները․ կալցիումը կարևոր է ողնաշարի համար, օգնում է թեթեւացնել մեջքի ցավն ու պահպանել ոսկորների բարվոք վիճակը։ Այս հանքանյութը կանխարգելում է արթրիտներն ու օստեոպորոզը, որոնք բացասաբար են անդրադառնում մարդու շարժունակության վրա և կարող են խիստ ցավերի պատճառ լինել։ Կալցիումն ամրացնում է ատամները, հոգում ծնոտների ոսկորների մասին։
2․ Կարգավորում է քաշը․ կալցիումն ինչպես կանանց, այնպես էլ տղամարդկանց օգնում է պահպանել մարմնի նորմալ զանգվածը։
3․ Պաշտպանում է սրտամկանը․ այս հանքանյութն օգնում է սրտի մկաններին կանոնավոր կերպով կծկվել ու թուլանալ։
Կարդացեք նաև
4․ Կանխարգելում է հաստ աղիքի քաղցկեղը․ բժիշկ Ուլրիկե Պիտերսն ու Քեթրին ՄաքԳլինը զեկույց էին հրապարակել, որտեղ նշվում է, որ կալցիումի բավարար քանակը կանխարգելում է հաստ աղիքի քաղցկեղը՝ ճնշելով պոլիպների աճը։
5․ Նվազեցնում է նախադաշտանային համախտանիշի ախտանշանները․ կալցիումի բավարար քանակությունն օգնում է հաղթահարել նախադաշտանային համախտանիշը՝ նվազեցնելով գլխապտույտների, տրամադրության փոփոխության, հիպերտոնիայի հավանականությունը։
6․ Կարգավորում է օրգանիզմի թթվահիմնային (pH) հավասարակշռությունը․ անառողջ սնունդը, սննդում շաքարի ու պահածոյացված մթերքների գերակշռությունն օրգանիզմում թթվային միջավայր են առաջացնում, որը, համաձայն BMJ Open ամսագրում հրապարակված զեկույցի, կարող է երիկամներում քարերի առաջացման, հիպերտոնիայի և այլ հիվանդությունների պատճառ դառնալ։ Կալցիումն օգնում է պահպանել թթվահիմնային հավասարակշռությունը՝ բարելավելով մարդու օրգանիզմի վիճակը։
7․ Նպաստում է բջջաթաղանթի միջով սննդարար նյութերի տեղափոխմանը։
Օրգանիզմում կալցիումի անբավարարության ախտանշանները
- Մկանային ցավեր ու կծկումներ,
- ջղաձգումներ,
- սրտի ռիթմի արագացում,
- զարկերակային ճնշման բարձրացում,
- օստեոպորոզ,
- ատամների հետ կապված խնդիրներ,
- լնդերի հիվանդություններ,
- անքնություն,
- նախադաշտանային համախտանիշ։
Կալցիումի սննդային աղբյուրները
Տարածված կարծիք կա, որ կաթն է կալցիումի ամենահարուստ աղբյուրը, սակայն, բրոկոլին, օրինակ, նույնպես կարող է հարստացնել օրգանիզմը կալցիումի անհրաժեշտ քանակով։ Նաև պետք է նշել, որ յուղազերծված կաթն ու սովորական կաթը գրեթե նույն չափով են կալցիում պարունակում։
Հիմնական աղբյուր են համարվում՝
- Կաթն ու կաթնամթերքը,
- ընդեղենը,
- ձկնեղենը (հատկապես սաղմոնն ու սարդինան),
- ծովամթերքը, ոստրեներ,
- քունջութը, արևածաղկի, չիայի սերմերը,
- կանաչ տերևավոր բաջարեղենը (բրոկոլի, սպանախ, կալե կաղամբը և այլն),
- նարնջի հյութը,
- սոյան, սոյայի մթերքները,
- բրինձը,
- կանաչ ոլոռը և այլն։
Պատրաստեց՝ Մարինե ԱԼԵՔՍԱՆՅԱՆԸ
