Կառավարությունը «Ռենշին» ՍՊԸ-ին է օտարում Սարյան 22 հասցեում գտնվող «Հայփոստ»-ի շենքը։ Այս մասին որոշման նախագիծը ներառված է կառավարության նիստի այսօրվա օրակարգում։
Ըստ որոշման նախագծի՝ «Ռենշին»-ի ներկայացրած ներդրումային ծրագրով նախատեսվում է «Հայփոստ»-ը վերածել Համաշխարհային առեւտրի կենտրոնի (World Trade Center (WTC):
Ծրագրի ընդհանուր գնահատված արժեքը կազմում է մոտ 212 մլն դոլար։ «Ռենշին»-ը նախատեսում է մեկնարկային փուլում ներդնել շուրջ 211,553,497 մլն դոլար, ակնկալվում է, որ կստեղծվի 10 հազար աշխատատեղ։
Նախագծում նշված է, որ գույքի ընդհանուր արժեքը կազմում է 10, 949, 260, 000 դրամ, որից ԲՏԱ նախարարությանը պատկանում է 6, 788, 000, 000 դրամ, Պետական գույքի կառավարման կոմիտեին՝ 4 161 260 000 դրամ։ Շենքն օտարվում է «Հայփոստ» ՓԲԸ՝ 30.18 %, կառավարություն՝ 19.82 %, ներդրող՝ 50% սկզբունքով:
Կարդացեք նաև
Որոշման նախագծով սահմանված է, որ ստեղծվելու են կոնֆերանս դահլիճներ՝ միջազգային ֆորումների, գագաթնաժողովների համար, համերգասրահ, ցուցասրահներ ժամանակակից արվեստագետների համար, «EXPO» սրահ, գործարար կենտրոն՝ ստարտափների, նախաձեռնությունների եւ գործարար ակտիվության ծավալելու համար․ «Ծրագրի նպատակներից է հասնել որակի բացառիկ մակարդակի՝ Հայաստանի շուկայում ձեւավորելով քաղաքաշինության նոր չափանիշներ, և նպաստել Հայաստանի առաջխաղացմանը միջազգային մակարդակում։ Համայնքում իրականացվելիք կանաչ շինարարությունը եւ ճարտարապետությունը ուղղված կլինեն նվազեցնելու կամ մեղմելու շենքերի եւ շինությունների բացասական ազդեցությունը շրջակա միջավայրի վրա՝ այդ ընթացքում շինությունները պահելով հարմարավետ, առողջության համար անվտանգ եւ դիմացկուն»:
Նելլի ԲԱԲԱՅԱՆ
