Այսօր Ավանում ՔՊ-ի նախընտրական քարոզարշավի ժամանակ քաղաքապետի թեկնածու Տիգրան Ավինյանը մոտեցավ բակային տարածքում խաղացող երեխաների, հարցուփորձ արեց: Մի բնակիչ, տեսնելով թեկնածուին, ասաց. «Ոնց կաք, էդպես էլ մնացեք, մենակ չփոխվեք կյանքում»: Ավինյանը արձագանքեց. «Ես ձեր վստահությունն արդարացնելու եմ անպայման: Գալիք 5 տարում ոչ մի անբարեկարգ բակ չի մնալու, այն, ինչ հիմա կոպիտ ասած ներվ է քանդում ու վնաս է տալիս, դա մի հատ վերացնենք, հաջորդ փուլում նոր բակերին ենք անցնելու»: Երբ ավանցի Ալլան եւս մեկ անգամ հորդորեց՝ «տղա ջան, չփոխվես հանկարծ», քարոզարշավին մասնակցող առողջապահության նախարար Անահիտ Ավանեսյանը ծիծաղեց՝ հավաստելով. «Փոխվելու ժամանակը անցել ա արդեն»:
Բակերից մեկում էլ բնակիչներից մեկն ասաց, որ իրենց շենքի վերելակը փոխել են հուլիսին, բայց խնդիրներ ունի ու լավ չի աշխատում, հարկերում մեկ կանգնում է, մեկ չի կանգնում: Ավինյանը որոշեց բնակչի հետ օգտվել այդ վերելակից եւ անձամբ համոզվել, հետն էլ կանչեց քաղաքապետարանի կոմունալ տնտեսության վարչության պետ Արսեն Կարոյանին՝ ասելով. «Արի, դրածդ լիֆտերին տեր կանգնի»:
Մեկ այլ բնակիչ դժգոհեց. «Պարո՛ն Ավինյան, էս դեմի կանգառը չի կանգնում տրանսպորտը, դիմացը կանգնում է»: Թեկնածուն ճշտեց՝ կանգառ կա՞ բայց, պարզվեց՝ չկա, իսկ բնակիչը հակադարձեց. «Մենակ 65 համարն է կանգնում, առաջ կանգնում էին: Կանգառը խաչմերուկում է»: Ավինյանն ասաց. «Ընդամենը պիտի ոտքով իջնեք, 2 մետր տեղ է, խնդի՞ր ա»: Բնակիչն ասաց, որ 600 մետր է հեռավորությունը, խոստացան տրանսպորտի վարչության պետի հետ խնդիրն ուսումնասիրել:
Հռիփսիմե ՋԵԲԵՋՅԱՆ
