Նիկոլ Փաշինյանին Սյունիքի մարզի՝ Մեղրիի բնակչուհին հարց ուղղեց Մեղրիում ապրելու ռիսկային եւ անվտանգային առումով խնդրահարույց լինելու վերաբերյալ: Նա խնդրեց նշել՝ արդյոք որեւէ վտանգ կամ ապակայունացման հավանականություն կա, արդյոք իրենց բնականոն խաղաղ պայմանները կարող են խաթարվել:
«Ես էլ եմ մտահոգված այն փաստից, որ այդ թվում՝ որոշ միջազգային գործընկերներ երբեմն ասում են, որ իրենց քաղաքացիներին խորհուրդ չի տրվում գնալ հարավ, ինչը բիզնեսի համար որոշակի դժվարություններ է ստեղծում, բայց մյուս կողմից պետք է արձանագրեմ, որ ՀՀ կառավարությունը բազմամիլիարդ ծրագրեր է իրականացնում ամբողջ հանրապետությունում եւ Սյունիքի մարզում մասնավորապես:
Վերջին 5 տարիներին մենք ամենամեծ ներդրումներն արել ենք Սյունիքի մարզում՝ շուրջ 100 մլրդի չափով»,-ասաց Փաշինյանը։
Նրա խոսքով, այժմ վերակառուցվում է Հայաստան-Իրան սահմանին գտնվող մաքսակետը, որը աշխատատեղերի համար խթան է հանդիսանալու: Ի թիվս այլնի, Փաշինյանը հավելեց, որ շուտով կսկսվի Հյուսիս-Հարավ մայրուղու Ագարակ-Քաջարան հատվածի կառուցումը, Եվրամիությունն էլ արդեն իսկ խոշոր հատկացումներ է արել Սյունիքի մարզի դիմակայունությունը բարձրացնելու համար, գործարկվել է նաեւ Կապանի օդանավակայանը, նաեւ 60 կրթահամալիրների կառուցման ծրագիր է իրականացվելու Սյունիքի մարզում:
Կարդացեք նաև
«Ես ընդհանրապես չեմ ընդունում, որ Սյունիքի մարզը կամ Մեղրին երբեւէ Հայաստանից որեւէ ձեւով անջատեն: Մենք Սյունիքը որպես անվտանգային խոցելի գոտի չենք առանձնացնում: Սյունիքի մարզի անվտանգությունը մեր ամենօրյա աշխատանքի մեջ է…Մենք ի՞նչ ենք կարծում՝ Մեղրիով պե՞տք է անցնի երկաթուղի, որը կկապի Արեւելքը Արեւմուտքին, այդ թվում՝ Ադրբեջանը Նախիջեւանին եւ Թուրքիային, այդ թվում՝ Մեղրին Երասխին եւ Հայաստանի մնացած մասին, այդ թվում՝ Հայաստանը միջազգային երկաթուղային ցանցին…Այո, միանշանակ»,-ասաց նա:
Մանրամասները՝ տեսանյութում:
