Արդյոք Նարեկ Սամսոնյանին ձերբակալությունը, երբ ոստիկանները բիրտ ուժ էին կիրառել, իրավաչափ էր։ Այս մասին կառավարության նիստից հետո լրագրողները հետաքրքրվեցին մարդու իրավունքների պաշտպան Անահիտ Մանասյանից։
Ի պատասխան հարցի, Մանասյանն ասաց, որ Սամսոնյանին ձերբակալելու կադրերը տեսնելուց եւ տեղեկատվությունը տարածվելուց հետո ՄԻՊ աշխատակազմի ներկայացուցիչներն այցելել են Սամսոնյանին եւ Սաղաթելյանին․ «Տվյալ համատեքստում մենք առնվազն կասկած ունեցել ենք՝ նկատի ունենալով այն, որ դիմել ենք իրավասու մարմիններին։ Պարզաբանում ենք պահանջել իրավասու մարմիններից, պարզաբանում ստանալուց հետո եզրահանգում կանենք։ Անհամաչափ ուժի կիրառման մասին առնվազն եթե դիմել ենք իրավասու մարմիններին, նշանակում է, որ կասկած ենք տեսել»։
Հարցին՝ արդյոք ՄԻՊ-ը մարդու իրավունքների խախտում կհամարի, եթե օրինակ Տավուշի մարզի Ոսկեպար բնակավայրից ինչ-որ հատված տրվի Ադրբեջանին, Մանասյանը պատասխանեց՝ անձանց իրավունքների ցանկացած խախտում եւ դրան ցանկացած միջամտություն մարդու իրավունքների պաշտպանության տեսանկյունից խնդրահարույց կլինի․ «Այլ հարց է, թե ով է պատասխանատուն այդ իրավունքի խախտման համար։ Այստեղ պատասխանատու սուբյեկտների ամրագրման հարցը փոքր ինչ այլ է, եւ բնականաբար, դա ենթադրում է, որ պետք է տեղի ունենա համակողմանի բավարար վերլուծություն եւ ուսումնասիրություն հարցի առնչությամբ։ Մեր տարեկան հաղորդման մեջ լուրջ հատված նվիրել ենք սահմանամերձ բնակավայրերում մարդու իրավունքների պաշտպանության խնդիրներին։ Արձանագրել ենք իրավունքների բոլոր խախտումները, դրանց մի մասը ադրբեջանական զինծառայողների առկայության պատճառով են եւ նրանց գործողություների, բայց դա նաեւ ենթադրում է, որ հայաստանյան իրավասու մարմինները պետք է կոնկրետ գործողություններ իրացնեն, որոնք դարձյալ ներկայացված են տարեկան հաղորդման շրջանակներում՝ իրավունքների խախտումները կանխարգելելու եւ դրանց հետեւանքները հաղթահարելու ուղղությամբ»։
Նելլի ԲԱԲԱՅԱՆ