Արդարադատության գեներալ-մայոր Թաթուլ Պետրոսյանը «Հայելի» ակումբում խոսելով ԱԺ ամբիոնից իշխանական պատգամավոր Խաչատուր Սուքիասյանի հնչեցրած սպառնալի խոսքերի մասին’ արձանագրեց, որ ինքը բազմիցս առիթ ունեցել է ասելու, որ անկախությունից հետո Հայաստանում ձեւավորված կապիտալը կամ բիզնեսմեն կոչված սուբյեկտները չունեն հայրենիք եւ սրբություն։
«Նրանց համար ամենակարեւորը, սրբությունը փողն է եւ իրենց կապիտալը։ Խաչատուր Սուքիասյանը ԱԺ-ում հրապարակավ հայտարարում է, որ ինքը եղել է բունկերում, հանդիպել է Սամվել Բաբայանի հետ։ Նա ավելի հեռուն գնաց’ ընդդիմությանը սպառնալով, որ հանգիստ, խելոք չպահելու դեպքում քրեական հետապնդման կենթարկեն, կսպանեն կամ կունեզրկեն։
Ունեզրկել ձեւակերպումը Սուքիասյան տեսակների համար առաջնային խնդիր ունի։ Այս սպառնալիքը իրական դաշտում կոնկրետ բռնության կոչ է իրենից ներկայացնում։
Առաջին դեպքում բունկերում լինելը ինքնախոստովանական ցուցմունք է, երկրորդ դեպքում` կոնկրետ բռնության կոչ, կոնկրետ անձանց, կոնկրետ անձանց խմբի նկատմամբ։ Եվ գլխավոր դատախազ կոչված աղջնակը, որը չգիտես ինչու ավելի շատ տեսական մեկնաբանություններ է անում արարքների վերաբերյալ, դրանք ձեւակերպելով միջանձնային հարաբերություններ, այդ արարքին պետք է իրական գնահատական տա։
Կարդացեք նաև
Կապիտալ ունեցող անձանցից մեկին ժամանակին հարց էին տվել, թե ինչպես է վաստակել իր միլիոնները, որին նա շատ կոնկրետ եւ հստակ պատասխանել էր, որ առաջին միլիոնի մասին չհարցնեն, իսկ մնացածը կհիմնավորի, թե ինչպես է վաստակել։
Առաջին միլիոնի մասին Խաչատուր Սուքիասյանը թող հիշի 90-ական թվականները, թե երբ սկսեց հարստանալ, ում ուժերով եւ ում տանիքի ներքո։ Այդ վաստակած միլիոնները պատահական ժառանգություն չեն։ Եվ հիմա վախից ելնելով է նա նման մտքեր ասում։
Նա նաեւ պետք է հիշի. թե այս 30 տարիների ընթացքում ինչպես էր կարողանում տեղավորվել նախկին նախագահների ժամանակաշրջանում։ Նրա բիզնեսը երբեւէ կորուստ չունեցավ։ Նա նորից հարստացավ։ Եվ հիմա նա շարունակում է ավելիի ձգտել. իր բառապաշարով` հարեւանների, մեր բառապաշարով` մեր թշնամիների հետ բիզնես անել»,- ասաց արդարադատության գեներալ- մայորը։
Աշոտ ՀԱԿՈԲՅԱՆ
