Քանոնահարուհին, հանրապետական ու միջազգային մրցույթ-փառատոների դափնեկիր Մարիաննա Գեւորգյանին Երեւանի Հրաչյա Ղափլանյանի անվան դրամատիկական թատրոնի ունկնդիրը հանդիպեց ճապոնական կոտո նվագարանով: Այն թատրոնը Ճապոնիայից ձեռք է բերել Գրիգոր Խաչատրյանի բեմադրած Շեքսպիրի «Համլետ» ներկայացման համար, որի ժամանակ էլ նվագում էր Մարիաննան:
Aravot.am-ի հետ զրույցում երաժիշտը ներկայացնելով Կոտոն՝ ասաց, որ այն ճապոնական ավանդական լարային կսմիթային նվագարան է, նմանատիպ գործիքները տարածված են նաեւ Կորեայում ու Չինաստանում, որոնք էլ տարբերվում են լարերի քանակով, նվագելու տեխնիկայով, անվամբ (կա նաեւ բաս կոտո): Կոտոն համարվում է արքունական նվագարան, ըստ ծագումնաբանության՝ 8-րդ դարից է: Ըստ ճապոնացիների, կոտո նվագելը ասոցացվում է արիստոկրատության, իմաստության եւ էլեգանտության հետ:
Մեզ հետ զրույցում Մարիաննա խոսելով իր եւ ռեժիսոր Գրիգոր Խաչատրյանի համագործակցության մասին՝ հետեւյալը նշեց. «Երբ Գրիգոր Խաչատրյանն առաջարկեց կոտո նվագել «Համլետում», այնքան գեղեցիկ ներկայացրեց գաղափարը, որ առանց վարանելու ընդունեցի առաջարկը, բայց թե ինչպես էի նվագելու այդ գործիքի վրա, չէի էլ մտածել: Չնայած համագործակցություն ունեցել էի ճապոնացի կոտոյահար երաժշտի հետ, գործիքը ծանոթ էր ինձ, ծանոթ էի նաեւ մակոտո գործիքի հետ, քանի որ քանոնի հետ համատեղ կատարումով հանդես էինք եկել: Առաջադրանքին սիրով ու նվիրվածությամբ մոտեցա, դրան գումարվեցին նաեւ պատասխանատվությունն ու մասնագիտական վարպետությունը, եւ արդյունքում այդ «մարտահրավերը» հաղթահարվեց»:
Կարդացեք նաև
Մարիաննա Գեւորգյանը անդրադառնալով Գրիգոր Խաչատրյանի պրոֆեսոինալիզմին եւ ռեժիսորական ինքնատիպ մտածողությանը՝ շնորհակալություն հայտնեց իրեն վստահելու եւ յուրահատուկ ձեւով ներկայանալու հնարավորության մասին: Նաեւ խորհուրդ տվեց բոլորին անպայման դիտել նորովի բեմադրված «Համլետը», որտեղ այդքան ջանք կա ներդրված:
Գոհար ՀԱԿՈԲՅԱՆ
Լուսանկարները՝ Տիգրան Առաքելյանի
Excellent, Marianna!!!