Նրանք, ովքեր դիտել են Հայաստանի երկրորդ եւ երրորդ նախագահների հարցազրույցները, իսկ այնուհետեւ կարդացել են ներկայիս վարչապետի նյարդային արձագանքները, ճիշտ են նկատել, որ անկախ ասածների բովանդակությունից, աչքի է զարնում ոճերի, մոտեցումների, բառապաշարների տարբերությունը: Փաշինյանի խոսույթը քաղաքական բանավեճի սահմաններից դուրս է, անզուսպ է, կռվազան, բամբասկոտ, վայել է «փողոցային ռազբիրատի»: Պարզ է, որ դա արտացոլում է ոչ միայն Հայաստանի ներկայիս ղեկավարի մտավոր եւ մշակութային ներաշխարհի առանձնահատկությունները, այլեւ իր հասցեատերերի, իր լսարանի, ՔՊ-ականների պատկերացրած «ժողովրդի» որակները:
Ընդդիմությունը կանգնած է երկընտրանքի առաջ՝ մտնել այդ՝ «քուչի կռվի» դա՞շտ, որտեղ ՔՊ-ականները, եկեք ընդունենք, գրեթե անգերազանցելի են, եւ որտեղ նրանց միակ մրցակիցն ԱՄՆ-ում բնակվող Վարդան Ղուկասյանն է, թե՞ փորձել մնալ քաղաքական խոսույթի շրջանակներում: Պարզ է, թե իմ մոտեցումը որն է, եւ ես տհաճությամբ եմ տեսնում, որ ընդդիմադիրները երբեմն նույնպես տուրք են տալիս այդ՝ ՔՊ-ական, անձնական կոմպրոմատի ոճին: Արդարացումն այն է, որ «մենք պետք է խոսենք իրենց լեզվով, որ ժողովուրդը մեզ հասկանա»: Չգիտեմ, գուցե եւ ճիշտ է՝ պարզապես այդ տեսակի «ժողովուրդը», որը պետք է «հասկանա», ինձ երբեք չի հետաքրքրել՝ լինի դա մեկ միլիոն, թե 10 միլիոն մարդ:
Բայց ուզում եմ իմ ընթերցողների, «ոչ ժողովրդի» ուշադրությունը դարձնել բազմիցս շոշափված հարցին՝ 2019 թվականի ԵԱՀԿ Մինսկի խմբի առաջարկի վրա: Փաշինյանը խոստացել է ինչ-որ «բանակցային փաստաթղթեր» (ուշադրություն դարձրեք, ոչ թե առաջարկը, այլ «փաստաթղթերը») «սկան» անել եւ հրապարակել: Պարզ է, որ նա «սկան» կանի եւ կհրապարակի այն «փաստաթղթերը», որոնք իրեն ձեռնտու են եւ կուղեկցի դրանք իրեն ձեռնտու մեկնաբանություններով:
Դրանից հետո պաշտոնական քարոզչությունը կասի. «Ըհը՜, էդքան ասում էին՝ հրապարակեք: Հիմա տեսա՞ք, որ առաջարկը շատ վատն էր»: Կամ՝ «Ոչ մի առաջարկ էլ, ըստ էության, չկար»: Կամ՝ «Մենք ոչ մի առաջարկ էլ չենք մերժել»: Կարելի է եւս հազար բան մոգոնել՝ լեզուն ոսկոր չունի: Միեւնույն է, այդ հարյուր, թե ավելի էջը ամենաշատը 10 հոգի է կարդալու, իսկ «ժողովուրդը» ընկալելու է միայն այն ցայտուն, կիսագողական ձեւակերպումները, որոնք այդ «փաստաթղթերի» վերաբերյալ հնչեցնելու է Փաշինյանը:
Կարդացեք նաև
Այդ «ժողովուրդը» շատ իմաստուն է:
Արամ ԱԲՐԱՀԱՄՅԱՆ
