Երևանի քաղաքապետի մամուլի քարտուղար Արտյոմ Կարապետյանի ֆեյսբուքյան գրառումը
Քաղաքային իշխանության մոլի ընդդիմախոսներն այս անգամ էլ առաջ են ընկել բնականոն հունով ապրող նորատունկ ծառերի ծաղկունքից և թմբկահարել, թե, մասնավորապես, ալբիցիաները, լագեստրոմիաները կամ հնդկական յասամանները իբր ամբողջովին չոր են ու ծաղկունքի փոքր հույս անգամ չեն ներշնչում, բայց իրականությունն այլ է:
Հղում ենք անում մասնագետներին, այսպես՝ հրապարակման մեջ նշված ծառերը իդեալական վիճակում են, պարզապես դրանց հյութաշարժը բավականին ուշ է սկսում և ծաղկում են հունիսի կեսերին: Հատկապես ալբիցիան 4-5 ամիս ծաղկման շրջան է ունենում:
Մեկնաբանությունում նշված ծառերի գները ևս իրականության հետ աղերս չունեն, դրանք վերաբերում են տասը տարեկան հասուն ծառերին:
Կարդացեք նաև
Տնկարանի ընդլայնմանը զուգահեռ ձեռք են բերվել նաև համեմատաբար ցածր գնով փոքր ծառեր, որոնք տնկարանում աճեցնելուց և մեծացնելուց հետո, ինչպես նախորդ տարի, այս տարի ևս տեղափոխվել և տեղափոխվում են քաղաքի կանաչ գոտիներ: Այդ ծառերի սակագները տատանվում են 20 հազարից մինչև 35 հազար դրամ: Այս կերպ ձեռք են բերվել հազարավոր ծառեր, և տնկարանի միջոցով քաղաքը տնտեսումներ է ապահովել:
Նշենք նաև, որ Երևանում տնկվում են նաև բազմաթիվ ծառեր, թփեր և ծաղիկներ, որոնք բացառապես աճեցվել են համայնքային տնկարանում, մասնավորապես՝ աճեցվել է տարբեր տեսակի ավելի քան 10 հազար ծառ, ավելի քան 50 հազար ծաղկատեսակ և շուրջ 100 հազար թփատեսակ:
