BBC-ի հրապարակման համաձայն՝ Մեծ Բրիտանիայում խորհրդարանը հաստատել է «Ծխախոտի և վեյփերի մասին» օրինագիծը, որով արգելվում է 2009 թ.-ի հունվարի 1-ից հետո ծնվածներին ծխախոտ վաճառել ամբողջ կյանքի ընթացքում։ Այս կարգավորումների նպատակը մինչև 17 տարեկանների շրջանում ծխելը կանխելն ու ծխախոտից ազատ սերունդ ունենալն է։
Թագավորական ընտանիքի կողմից օրինագծի հաստատումից հետո նախարարները նաև կստանան նոր լիազորություններ՝ կարգավորելու ծխախոտի, վեյփերի և նիկոտին պարունակող արտադրանքների շրջանառությունը, ներառյալ դրանց համերն ու փաթեթավորումը։
Հակածխախոտային պայքարի շրջանակներում էլեկտրոնային սիգարետները կարգելվեն երեխաներ տեղափոխող ավտոմեքենաներում, խաղահրապարակներում, ինչպես նաև դպրոցների և հիվանդանոցների շրջակայքում՝ ընդլայնելով ծխախոտազերծ տարածքների արգելքները։
Թարգմանությունը՝ Մարինե ԱԼԵՔՍԱՆՅԱՆԻ
