«Կանգնեք ժողովրդավարության կողքին, մնացեք հանուն ժողովրդավարության»,- այս վանկարկումներով այսօր առավոտից Երեւանում ընթացող ԵՄ գագաթնաժողովին զուգահեռ բողոքի ցույցերով փողոց դուրս եկած ՀՀ քաղաքացիները գրավեցին բրիտանացի լրագրողի ուշադրությունը:
Նրանք լրագրողին պատմեցին, որ դժգոհ են այս իշխանությունների վարած քաղաքականությունից: Մի տարեց կին անգլերեն ասաց, որ չեն ուզում Նիկոլ Փաշինյանին ու նրա կառավարությանը, պահանջում են, որ հեռանան:
Կարդացեք նաև
ԱԺ նախկին պատգամավոր Աննա Կոստանյանն էլ ասաց՝ Փաշինյանը կիլոմետրերով հեռու է ժողովրդավարությունից:
«Մենք ուզում ենք ցույց տալ, որ Փաշինյանը ՀՀ լեգիտիմ առաջնորդ չէ ու այս գագաթնաժողովը տալիս է լեգիտիմություն ու աջակցություն նրան, սա լավ է նրա համար, բայց ոչ մեզ համար»,- ասաց Կոստանյանը՝ անդրադառնալով նաեւ Բաքվում պահվող Արցախի ռազմաքաղաքական ղեկավարության իրավունքների ոտնահարմանը:
Երբ բրիտանացի լրագրողը հետաքրքրվեց՝ կոնկրետ ՀՀ ներսում հակաժողովրդավարական ինչ խնդիրներից են անհանգստացած, հարցին պատասխանեց «Հայաքվե» նախաձեռնության անդամ Մենուա Սողոմոնյանը:
Նա պատմեց, որ քաղաքական հայացքների համար հեռացվել է Երեւանի պետական համալսարանից որպես դասախոս, խոսեց Հայ Առաքելական եկեղեցու հոգեւորականների, ամենայն հայոց կաթողիկոսի դեմ սկսված հակասահմանադրական պայքարից, բարերար Սամվել Կարապետյանի եւ մի շարք այլ քաղաքական հայացքների համար բռնաճնշումների ենթարկվող անձանց դեպքերից:
Հիշեցնենք, որ քաղաքացիներն այսօր ամբողջ օրվա գրաֆիկով բողոքի ցույցեր են անցկացվում Կարեն Դեմիրճյանի անվան մարզահամերգային համալիրի մոտակայքում, որտեղ անցկացվում է ԵՄ գագաթնաժողովը, որին մասնակցում են ՀՀ եկած եվրոպական տերությունների բարձրաստիճան պաշտոնյաներ, պատվիրակություններ:
Արփինե ՍԻՄՈՆՅԱՆ
Լուսանկարները՝ Հայաքվեի
