Գյումրու քաղաքապետի պաշտոնակատար Ավետիս Առաքելյանին, որը զբաղեցնում է «Ուժեղ Հայաստան» դաշինքի նախընտրական ցուցակի 8-րդ համարը ու քարոզարշավի մեջ է, պաշտոնապես փոխարինում է փոխքաղաքապետ Գագիկ Մանուկյանը։ Նա գյումրեցիներին առավել հայտնի է «կոմունիստ փոխքաղաքապետ» անվամբ։
Գյումրու քաղաքապետարանի աշխատակազմի քարտուղար Կարեն Մալխասյանը Aravot.am-ին տեղեկացրեց, որ որոշում է կայացվել՝ պարտականությունները դնել փոխքաղաքապետի վրա։
Նշենք, որ Գյումրին ունի երկու փոխքաղաքապետ․ առաջինը փոխքաղաքապետը Ավետիս Առաքելյանն է՝ Վարդան Ղուկասյանի փեսան, որը նրա կալանավորվելուց հետո սկսեց փոխարինել նրան, երկրորդ փոխքաղաքապետը Գագիկ Մանուկյանն է։
Գագիկ Մանուկյանը ևս Վարդան Ղուկասյանի հավատարիմ մարդկանցից է՝ փորձառու է, տարիներ շարունակ եղել է Գյումրու փոխքաղաքապետը։
Կարդացեք նաև
Գյումրու քաղաքապետարանի աշխատակազմի քարտուղար Կարեն Մալխասյանը մեզ նաև հավաստիացրեց, որ քաղաքի կառավարման գործընթացը բնականոն ընթանում է։
Ակտիվ քարոզարշավի մեջ է նաև Շիրակի մարզպետ Դավիթ Առուշանյանը, որը գլխավորում է ՔՊ-ի մարզային շտաբը։ Մարզպետի պարտականությունները, ինչպես փոխանցեցին Շիրակի մարզպետի աշխատակազմից, դրվել են մարզպետի տեղակալ Ալբերտ Այվազյանի վրա։
Ալբերտ Այվազյանը Առափի համայնքի 31 տարվա գյուղապետն էր․ նա 2021 թվականի Ախուրյան խոշորացված համայնքի ՏԻՄ ընտրություններում գլխավորում էր ՔՊ-ի ցուցակը, այդ ժամանակ չկարողացավ ստանձնել Ախուրյանի համայնքապետի պաշտոնը․ ընդամենը մեկ ձայնով զիջեց «Ախուրյան դաշինքի» թեկնածու Արծրուն Իգիթյանին, որից հետո նշանակվեց Շիրակի փոխմարզպետ։
Նունե ԱՐԵՎՇԱՏՅԱՆ


















































