Ստեփանակերտի դրամատիկական թատրոնի մշտական խաղացանկը կհարստանա։
Այն կհամալրվի «Ռուզան. Արցախի դուստրը» բեմադրությամբ՝ հայ դասական Մուրացանի «Ռուզան» պիեսի հիման վրա։ Ներկայացման պրեմիերան կկայանա հունիսի 28-ին և 29-ին «Համազգային» թատրոնի բեմում։
Արցախցի դերասանները կներկայացնեն հայրենասիրության և ազատության համար պայքարի պատմությունը՝ երիտասարդ հայ իշխանուհի Ռուզանի հերոսական կերպարի և անձնազոհության համատեքստում։ Մուրացանի ստեղծագործությունը նվիրված է 13-րդ դարում՝ թաթար-մոնղոլական արշավանքների ժամանակաշրջանում, Արցախում տեղի ունեցող իրադարձություններին։
Պատմական դրաման բեմադրել է Վահրամ Փափազյանի անվան Ստեփանակերտի դրամատիկական թատրոնի ռեժիսոր և գեղարվեստական ղեկավար Ռուզան Խաչատրյանը։ Գլխավոր՝ արցախցի հայրենասեր կնոջ՝ Ռուզանի կերպարը կմարմնավորի թատրոնի դերասանուհի, Գալյա Նովենցի անվան թատերական դպրոցի Արցախի դասընթացի ունկնդիր Շողեր Սարգսյանը։ Ներկայացման մեջ ներգրավված է Ստեփանակերտի թատրոնի ողջ թատերախումբը, կան նաև հրավիրված դերասաններ։
Պատմական դրամայի բեմադրության իրականացումը հնարավոր է դարձել «Դիալոգ» հասարակական կազմակերպության աջակցության շնորհիվ։ Այս ներկայացման համար ստեղծվել են հատուկ զգեստներ և դեկորացիաներ։ Պատմական ժամանակաշրջանին համապատասխան զգեստների և դեկորացիաների ստեղծման աշխատանքներում ներգրավված են թատրոնի նկարիչներ Անտոն Քեշիշյանը և Մարինե Թադևոսյանը։
Ստեփանակերտի դրամատիկական թատրոնը Երևանում 2025 թվականի օգոստոսից գործում է մշտական հիմունքներով։ Թատրոնն իր փորձերն անցկացնում է Հայաստանի թատերական գործիչների միության դահլիճում։ Վահրամ Փափազյանի անվան Ստեփանակերտի դրամատիկական թատրոնը վերջերս երևանյան բեմում հաջողությամբ ներկայացրեց «Արցախյան սիրո պատմություն» ներկայացումը՝ արցախյան բարբառով։
Նելլի ԳՐԻԳՈՐՅԱՆ
