«Հայաստանում կա՛մ պետք է լուծարել Վարչական դատարանը, որովհետև դրա վճիռները կարող են իրավական նշանակություն չունենալ, կա՛մ էլ պետք է օրենսդրությունը փոխել և ընդունել, որ ԿԸՀ-ն ավելի վերև է կանգնած, քան Վարչական դատարանը»,- այսօր լրագրողների հետ հանդիպման ժամանակ կարծիք հայտնեց ՍԴ-ում «Ուժեղ Հայաստան» դաշինքի ներկայացուցիչ Արամ Վարդևանյանը։
Նրա պնդմամբ՝ Կենտրոնական ընտրական հանձնաժողովը չարաշահել է իր իրավունքները՝ իր նախաձեռնությամբ անվավեր ճանաչելով երկու ընտրատեղամասերի արդյունքները՝ արհամարհելով Վարչական դատարանի որոշումը, որով ԿԸՀ-ն պարտավորվում էր կրկնակի քվեարկություն կազմակերպել 2500 ընտրողի համար։
Արամ Վարդևանյանն ուշադրություն է հրավիրում այն հանգամանքին, որ ԿԸՀ-ն տվյալ երկու տեղամասերի արդյունքներն անվավեր է ճանաչել ոչ թե որևէ մի ուժի դիմումի հիման վրա, այլ սեփական նախաձեռնությամբ։ Արամ Վարդևանյանը երկու այլ տեղամասերի՝ 36/6 և 36/11 վերաբերյալ հետաքրքիր տվյալներ բացահայտեց․ ԿԸՀ կայքում հրապարակված ԸԸՀ որոշման մեջ գրված է, որ այդ տեղամասերի հանձնաժողովների երկու անդամ պետք է իրենց կարգավիճակից զրկվեն։ Սակայն ընտրությունների արդյունքներն ամփոփվել են, և ԿԸՀ-ի կողմից որևէ միջոց չի ձեռնարկվել։ Նման տվյալների մասին փաստերը, ըստ Արամ Վարդևանյանի, բազմաթիվ են։
Արամ Վարդևանյանի գնահատմամբ՝ «Քաղաքացիական պայմանագիր» կուսակցությունն իրականում չի հաղթել ընտրություններում, քանի որ չի հաղթահարել «50+1 ձայնային» շեմը, իսկ ներկայիս արդյունքներն արձանագրվել են բացառապես փոքր կուսակցությունների ձայների արհեստական փոշիացման հաշվին։
Կարդացեք նաև
Նա հույս հայտնեց, որ Սահմանադրական դատարանն անկախություն կդրսևորի և կկայացնի օրինական երեք որոշումներից մեկը՝ ընտրությունների արդյունքների ամբողջական չեղարկում, երկրորդ փուլի նշանակում կամ պատգամավորական մանդատների վերաբաշխում։
Ի դեպ, ՍԴ-ն, ինչպես փոխանցեց Արամ Վարդևանյանը, միջոցներ չի ձեռնարկել «Ուժեղ Հայաստանի» այն դիմումի առնչությամբ, որով խնդրել էին, որպեսզի տեղական ինքնակառավարման բոլոր մարմինները համեմատական տեղեկանքներ ներկայացնեն, թե 2025-ին և 2026-ին որքա՞ն սոցիալական աջակցության, տարբեր տեսակի օգնությունների, բնակչությանը տրամադրվող ֆինանսական աջակցության ծրագրեր են իրականացրել։ Արամ Վարդևանյանը գտնում է, որ ՍԴ-ի կողմից միջոցների չձեռնարկումն ավելի քան խոսուն է։
Մանրամասները՝ տեսանյութում
Ամբողջական տեսանյութը՝ այստեղ։
Նելլի ԳՐԻԳՈՐՅԱՆ
