«ԿԸՀ ներկայացուցիչներն ամեն կերպ փորձեցին շրջանցել մի շատ պարզ հարց, և դրա ձևակերպման պարագայում կտեսնեինք, որ իրենց կողմից պարզապես վերաքվեարկություն պետք է նշանակվեր։ Ստացվում է՝ հունիսի 7-ի ընտրություններից հետո տվյալների սխալ մուտքագրման պատճառով նախնական արդյունքների ամփոփման ժամանակ հայտարարվեց, որ ԲՀԿ-ն չի հաղթահարում 4 տոկոսի շեմը։ Մինչդեռ 4 տոկոսի շեմը չհաղթահարելը իրենց կողմից սխալ թվերը ներմուծելու հետևանքն է»,- ՍԴ նիստից հետո լրագրողների հետ ճեպազրույցում ասաց ԲՀԿ ներկայացուցիչ Էլինար Վարդանյանը։
Ինչպես արդեն տեղեկացրել ենք, ՍԴ-ն ավարտեց հունիսի 7-ի խորհրդարանական ընտրությունների արդյունքները վիճարկող քաղաքական 7 ուժերի կողմից ներկայացված դիմումների դատաքննությունը։
Որոշումը կհրապարակվի մինչև հուլիսի 4-ի օրվա վերջ։
Ըստ Էլինար Վարդանյանի՝ եթե նախնական արդյունքների արձանագրության մեջ ամրագրվեր, որ ԲՀԿ-ն հաղթահարել է 4 տոկոսի շեմը, այդ դեպքում ԿԸՀ-ն այդ 4 ընտրատեղամասերի արդյունքներն անվավեր ճանաչելուց հետո պետք է վերանշանակեր վերաքվեարկություն․ «Ստացվում է, որ ԿԸՀ-ն, իմ գնահատմամբ, դիտավորյալ չի ներմուծել տվյալները, որպեսզի հետագայում մանևրելու հնարավորություն ունենա»։
Կարդացեք նաև
Լրագրողների հիշեցմանը՝ ԿԸՀ ներկայացուցիչները մեղադրում են դիմումատուներին, թե հեղինակազրկում են ընտրական ինստիտուտը, Էլինար Վարդանյանն արձագանքեց․ «ԿԸՀ-ն լավ կաներ իր գործողություններով չնպաստեր ԿԸՀ-ի հեղինակազրկմանը։ Ասում են՝ մարդկանց հավատն եք կոտրում ընտրական համակարգի և ընտրությունների նկատմամբ այն պարագայում, երբ հսկայական թվով մարդիկ մասնակցել են ընտրություններին։ Կուզեի, որ ԿԸՀ-ն ձայներ ու մանդատներ գողանալու արդյունքում մեր ժողովրդին չզրկեր ընտրություններին և ընտրական գործընթացին հավատալու հնարավորությունից։ Ուզում եմ հավատալ, որ ՍԴ-ն կվերականգնի մեր հայրենակիցների հավատը ընտրական գործընթացների և ընտրության նկատմամբ»։
ՍԴ նիստն ու ճեպազրույցներն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
