«Այսօր՝ հուլիսի 2-ին, «Կոմիտաս պարկ» բնակելի համալիրի բնակիչները հավաքվել էին ՀՀ կառավարության շենքի դիմաց՝ վարչապետի և պատասխանատու մարմինների ուշադրությունը հրավիրելու իրենց խնդրին։
««Կոմիտաս պարկ» համալիրի առաջին փուլով նախատեսված շենքերը շահագործման պետք է հանձնվեին 3 տարի առաջ։ Համալիրն այսօր դեռ հանձնված չէ։ Հիմա էլ բնակիչները կանգնել են նոր ֆինանսական պահանջների առաջ։
Համալիրի կառուցապատող «Օրդ Դեվելոփմենթ» ընկերությունը (ղեկավար՝ Լևոն Օրդուխանյան) հրաժարվում է տալ գազի միացման համար անհրաժեշտ իր համաձայնությունը, եթե բնակիչները լրացուցիչ գումար չվճարեն։
Կառուցապատողը յուրաքանչյուր ընտանիքից պահանջում է հավելյալ 357,000 դրամ՝ որպես գազի միացման նախապայման։ Մինչդեռ բնակիչների պայմանագրերում նման կետ չկա։
Բնակիչները խնդրում են վարչապետ Նիկոլ Փաշինյանին՝ ուշադրություն դարձնել այս հարցին և տալ համապատասխան հանձնարարականներ, որպեսզի 3 տարի ձգձգվող քաշքշուկը վերջապես լուծվի։ Բնակիչները պահանջում են ընդամենը իրենց օրինական իրավունքների պաշտպանությունը։ Օրենքը պետք է հավասար լինի բոլորի համար, և բնակիչները չպետք է վճարեն կառուցապատողի սխալների կամ չնախատեսված ծախսերի համար»,- նշում են բնակիչները:
Կարդացեք նաև
Անընդունելի է օրենսդրությամբ չնախատեսված վճարների վերաբերյալ կառուցապատողի պահանջը «Կոմիտաս պարկ»-ում բնակարաններ ձեռք բերած հանրային ծառայողներին, նշում է քաղաքաշինության կոմիտեն
«Քաղաքաշինության կոմիտեն անընդունելի է համարում կառուցապատող «Օրդ Դեվելոփմենթ» ՍՊԸ կողմից «Կոմիտաս պարկ» բնակելի թաղամասում բնակարաններ ձեռք բերած հանրային ծառայողներին ներկայացվող, օրենսդրությամբ չհիմնավորված ֆինանսական պարտավորությունների պահանջը։
Տեղեկացնում ենք, որ Քաղաքաշինության կոմիտեն գրությամբ իր դիրքորոշումն է հայտնել կառուցապատող «Օրդ Դեվելոփմենթ» ՍՊԸ-ին գազամատակարարման ցանցին միանալու համար հանրային ծառայողներից պահանջվող վճարման վերաբերյալ։ Հայտնում ենք, որ որևէ վճար կատարելու պարտավորություն բնակիչները չունեն, բացառությամբ ՀՀ կառավարության 2020 թվականի դեկտեմբերի 30-ի N2206-Ն որոշմամբ նախատեսված, ի թիվս այլ ծախսերի, բնակարանի գազի բաժանորդ դառնալու վճարից։
Հորդորում ենք կառուցապատողին առաջնորդվել օրենսդրության պահանջներով և կատարել հանրային ծառայողներին բնակարաններով ապահովման ծրագրի շահառուների հետ պայմանագրերի կնքման և գազամատակարարման ապահովման պարտավորություններն առանց նախապայմանների», – նշված է քաղաքաշինության կոմիտեի տարածած հաղորդագրության մեջ:
