ՀՀ ԳԼԽԱՎՈՐ ԴԱՏԱԽԱԶԻՆ
ՀՀ ՀԱԿԱԿՈՌՈՒՊՑԻՈՆ ԿՈՄԻՏԵԻ ՆԱԽԱԳԱՀԻՆ
ՀՀ ՔՆՆՉԱԿԱՆ ԿՈՄԻՏԵԻ ՆԱԽԱԳԱՀԻՆ
ԴԻՄՈՂ` ԶԱՐՈՒՀԻ ՓՈՍՏԱՆՋՅԱՆ
ՀԱՂՈՐԴՈՒՄ ՀԱՆՑԱՆՔԻ ՄԱՍԻՆ
(Քննիչի գործողություններում հանցակազմի հատկանիշների առկայության վերաբերյալ)
Կարդացեք նաև
Սույնով հայտնում եմ, որ 06.07.2026 թվականին ՀՀ Քննչական կոմիտեի քննիչի որոշմամբ իրականացվել է Գագիկ Ծառուկյանի առանձնատանը գտնվող կենդանիների առգրավման և տեղափոխման գործընթացը Երևանի կենդանաբանական այգի։
Առգրավման գործողության ընթացքում կենդանիներին ներարկվել է քնեցնող/թմրեցնող դեղորայք, ինչից հետո առյուծներից մեկը` էգ առյուծը տեղափոխվել է կենդանաբանական այգի և այդպես էլ չարթնանալով՝ անկել է։ Կենդանաբանական այգու պաշտոնական հայտարարության համաձայն՝ կենդանին ունեցել է բազմաթիվ տարիքային և ուղեկցող հիվանդություններ (լյարդի, սրտի, թոքերի ախտահարում)։
Գտնում եմ, որ քննիչի գործողություններում առկա են հանցագործության հատկանիշներ՝ հետևյալ հիմնավորմամբ.
- Կենդանու կյանքի և անվտանգության անտեսում.
Քննիչը, հանդիսանալով պաշտոնատար անձ, պարտավոր էր ապահովել քննչական գործողության անվտանգությունը։ Նախքան տարեց և խնամքի տակ գտնվող կենդանուն թմրեցնող նյութեր ներարկելու և նրան իր բնականոն միջավայրից տեղափոխելու հրահանգ տալը, քննիչը չի ապահովել պատշաճ կենդանաբուժական նախնական քննություն՝ պարզելու համար, թե արդյոք կենդանու օրգանիզմը կդիմանա նման միջամտությանը։
- ՀՀ Քրեական օրենսգրքի 307-րդ հոդվածի խախտում.
Չնայած կենդանու ծանր առողջական վիճակին, նրա նկատմամբ կիրառվել են կյանքի համար վտանգավոր մեթոդներ (ուժեղ թմրեցում և սթրեսային տեղափոխում), ինչն անհամատեղելի է եղել նրա կյանքի հետ և հանգեցրել է կենդանու տանջալից մահվան (անվերադարձ քնի)։
- Պաշտոնեական անփութություն կամ լիազորությունների չարաշահում.
Քննիչը ցուցաբերել է հանցավոր անփութություն, հաշվի չի առել կենդանի էակի շահերն ու կյանքի իրավունքը, ինչի արդյունքում պետական գործողության հետևանքով ոչնչացվել է արժեքավոր կենդանի։ Այս վարքագիծը պարունակում է ՀՀ քրեական օրենսգրքի 441-րդ (Պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը) կամ 446-րդ (Պաշտոնեական անփութությունը) հոդվածներով նախատեսված արարքների հատկանիշներ:
- Մյուս առգրավված կենդանիների կյանքին և առողջությանը սպառնացող իրական վտանգը.
Քանի որ քննչական գործողությունների շրջանակներում առգրավվել և տեղափոխվել են նաև այլ կենդանիներ, չի բացառվում, որ նրանց ևս պատճառվի մահ կամ առողջության այլ ծանր վնաս։ Մինչ օրս հանրությանը հայտնի չէ և առկա չէ որևէ հավաստի տեղեկատվություն այն մասին, թե արդյոք առկա է համապատասխան մասնագիտական/կենդանաբուժական եզրակացություն՝ մյուս առգրավված կենդանիներին նոր միջավայրում (Երևանի կենդանաբանական այգում) անվտանգ պահելու, նրանց կերակրման, խնամքի և սթրեսային վիճակից դուրս բերելու պայմանների վերաբերյալ։ Առանց նմանատիպ մասնագիտական երաշխիքների կենդանիներին անհայտ պայմաններում պահելը նույնպես հանդիսանում է հանցավոր անփութության և անօրինական գործելաոճի շարունակություն, որը հղի է նոր կորուստներով։
Ելնելով վերոգրյալից և ղեկավարվելով ՀՀ Քրեական դատավարության օրենսգրքի 24-րդ գլխի համապատասխան նորմերով՝
ԽՆԴՐՈՒՄ ԵՄ՝
- Սույն հաղորդման հիման վրա նախաձեռնել քրեական վարույթ՝ պարզելու համար առգրավման որոշում կայացրած և այն իրականացրած քննիչի (կամ քննչական խմբի) գործողությունների օրինականությունը։
- Քրեաիրավական գնահատական տալ քննիչի գործողություններին՝ ՀՀ Քրեական օրենսգրքի 307-րդ հոդվածի (Կենդանիների նկատմամբ դաժան վերաբերմունք) ինչպես նաև 441-րդ և/կամ 446-րդ հոդվածների (Պաշտոնեական հանցագործություններ) հատկանիշներով։
- Պարզել, թե որ կենդանաբույժների կամ մասնագետների եզրակացության հիման վրա է քննիչը թույլատրել հիվանդ կենդանու թմրեցումն ու տեղափոխումը։
- Հրատապ կարգով քննության առնել և պարզել մյուս առգրավված կենդանիների պահման պայմանների օրինականությունն ու անվտանգությունը՝ կանխելու համար հնարավոր նոր անկումները կամ կենդանիների առողջությանը վնաս պատճառելը։
Զարուհի Փոստանջյան
