Բաքվի բանտում հայ ռազմագերիների նկատմամբ վերաբերմունքի, նրանց առողջության մասին ստացվող մտահոգիչ տեղեկությունների պարագայում Հայաստանի կառավարության անտարբերության մասին խոսելով՝ ՀՀ ԱԺ 8-րդ գումարման ԱԺ «Հայաստան» խմբակցության դաշնակցական պատգամավոր Գառնիկ Դանիելյանը «Հայելի» ակումբում ասաց. «Բազմիցս նշել ենք, որ այդ հարցերով զբաղվող մարմինը, ՀՀ կառավարությունն է։ Կառավարության ձեռքում են բոլոր լիազորությունները, հնարավորությունները միջազգային ատյաններում այս հարցը բարձրացնելուց սկսած, մինչեւ Հայաստան-Ադրբեջան բանակցային գործընթացի մասը դարձնելը։ Այսինքն, այս իշխանության ամենակարեւոր խնդիրներից մեկը ի՞նչը պետք է լիներ։ Ռազմագերիների, պատանդառված անձանց ազատման, անհետ կորածների, անհայտության մեջ գտնվող մարդկանց հարցը։
Անհայտության մեջ գտնվող մարդկանց հարցում տեսնում ենք, որ որեւէ առաջընթաց չկա։ Տեսնում ենք՝ հարազատները հավաքվել են կառավարության շենքի մոտ ու արդեն տեւական ժամանակ իրենց հանդիպող չկա, հանդիպելուց էլ այդ մարդկանց խաբում են, որեւէ նորություն, որեւէ նոր բան այդ մարդկանց չեն ասում։ Այսինքն, այս հարցը իրենց համար գոյություն չունի։
Գանք Բաքվում ռազմագերիների, պատանդառված անձանց, Արցախի ռազմաքաղաքական ղեկավարության հարցին։ Այս հարցով իմ տեսակետը մնում է նույնը։ Այս իշխանություններին ձեռնտու չի այդ մարդկանց Հայաստանի Հանրապետություն վերադարձնելը։ Ամեն ինչ մասին խոսում են Ադրբեջանի հետ, ինչ զիջումներ ասես Ադրբեջանը Հայաստանից ստանում է, իրենք իրենց գործն առաջ են տանում՝ խնդիր չկա, խաղաղության դարաշրջան է, բայց արի ու տես, որ քիչ չէ, որ Բաքվի բանտերում մեր հայրենակիցները խոշտանգվում են, իրենց իրավունքները պաշտպանող չկա, որեւէ հարցում առաջընթաց չկա ու այդ մարդիկ այնտեղ շարունակում են կտտանքների եւ բռնությունների ենթարկվել սրանց թեթեւ ձեռքով։
Այսինքն, այս իշխանություն կոչվածները իրենց լռությամբ, լուռ համաձայնությամբ, իրենց վարած քաղաքականությամբ Ադրբեջանին էլ ավելի թեւեր են տալիս հակաօրինական, հակաիրավական գործունեությունը շարունակելու։
Կարդացեք նաև
Ժամանակին ասել եմ, որ այստեղից Հայաստանի բարձրաստիճան իշխանության հայտարարությունները այնտեղ դառնում են նոր քրեական գործեր»։
Գառնիկ Դանիելյան
Գառնիկ Դանիելյանը անդրադարձավ նաեւ Ադրբեջանին զուգահեռ՝ Հայաստանում իրականացվող հետապնդումներին, մասնավորապես, Գագիկ Ծառուկյանին կալանավորելուն, ունեզրկելու փորձին, նրա ստեղծած ընկերություններում աշխատող հազարավոր մարդկանց անգործության մատնելուն։
«Ի պաշտպանություն Գագիկ Ծառուկյանի ակցիայի ժամանակ լրատվամիջոցներին ասել եմ ու եւս մեկ անգամ վերահաստատում եմ նշածս միտքն ու կարծիքը։ Հայաստանում բոլշեւիկյան մեթոդներով ունեցվածքի վերաբաժանման, կուլակաթափության գործընթաց է։ Մեկ անձ կամ մի խումբ գործող իշխանության պարագլխի ղեկավարությամբ իրեն իրավունք է վերապահում ունեցվածքի վերաբաշխում անել, խլել մարդկանց տարիների ընթացքում ստեղծած ձեռնարկությունները, նյութական միջոցները, տները։ Արդեն հասել են իրենց հետ փոխկապակցված անձանց, անգամ կենդանիներին։ Սա մի զզվելի պրոցես է, որը ոչ բարոյական ասպեկտի մեջ է տեղավորվում, ոչ էլ նորմալ ժողովրդավարական պետության տնտեսական քաղաքականության մեջ։ Սա խուժանապետության ցուցիչ է եւ երկրի վարկանիշի վրա բացասական ազդեցություն է ունենում»,-ասաց պատգամավորը։
Աշոտ ՀԱԿՈԲՅԱՆ
