Հակակոռուպցիոն դատարանում «Ուժեղ Հայաստան» կուսակցության առաջնորդ Սամվել Կարապետյանի գործով դատական նիստում պաշտպաններից Ռուբեն Հակոբյանը, դիմելով հանրային մեղադրողին, խնդրեց այսօր ներկայացված գույքային հայցի ապացույցների շրջանակը շարադրելիս առանձնացնել ու ներկայացնել կոնկրետ այն ապացույցները, որոնք, ըստ հանրային մեղադրողի, հաստատում են Կարապետյանի առնչությունը մեղադրանքի ձևակերպման մեջ նշված ընկերությունների իրական շահառու լինելու հետ։
Հանրային մեղադրող Արգամ Դալլաքյանն ասաց, որ գործով կան ապացույցներ, որոնցով հաստատվում է մեղադրյալներից Վլադիմիր Թարջումանյանի առնչությունը մեղսագրվող արարքին։ Կարապետյանին մեղսագրվում է Թարջումանյանի գործունեության կազմակերպումը։
«Հիմա, եթե կա ապացույց, որը կապվում է Թարջումանյանի հետ, սա չի՞ նշանակում, որ անուղղակի կերպով հաստատում է Կարապետյանի առնչությունն իրեն մեղսագրվող արարքին։ Այո, կարծում եմ, որ հաստատում է»,- ասաց հանրային մեղադրողը։
Կարդացեք նաև
Նա սկսեց թվարկել հայցում առկա ապացույցները և հավելեց, որ դրանք վերաբերում են մեղադրյալներ Վլադիմիր Թարջումանյանին ու Անդրանիկ Խաչատրյանին, ինչպես նաև մյուս մեղադրյալներին, որոնք գտնվում են հետախուզման մեջ, իսկ Սամվել Կարապետյանին առնչվում են անուղղակի կերպով։
Պաշտպաններից Արմեն Ֆերոյանն էլ հարց տվեց. «Անուղղակի կերպով ինչպե՞ս է առնչվում Սամվել Կարապետյանին։ Մեզ դա պետք է, որ պարզաբանեն, որ հասկանանք՝ ինչ կերպ է առնչվում և ինչից պաշտպանվենք»։
Հանրային մեղադրողն էլ պատասխանեց՝ եթե թույլ տան, խոսի, բոլոր հարցերի պատասխանը կստանան: Այս պահին էլ հանրային մեղադրողը դեռ թվարկում է գույքային հայցի քննության շրջանակում հետազոտման ենթակա ապացույցները:
Արփինե ՍԻՄՈՆՅԱՆ
