«Հայաստանում կամ Հայաստանից դուրս չկա որեւէ միամիտ մարդ, ով կկարծի, որ Սահմանադրության մասին այս քննարկումները Հայաստանում ծնված օրակարգ են»,- ԱԺ նիստում ասաց «Հայաստան» խմբակցության ղեկավար Աննա Գրիգորյանը։
Նա նշեց, որ այն, ինչ բովանդակային առումով այսօր քննարկվում է, որեւէ առնչություն չունի 2020 թվականի սահմանադրական փոփոխության բովանդակության հետ։ «Այսօրվա Սահմանադրության հարցը բացառապես այն տիրույթում է՝ մենք պետք է հանե՞նք Անկախության հռչակագրին հղումը, թե՞ չէ։ Իրերը պետք է կոչել իրենց անունով՝ կան Ադրբեջանի նախապայմաններ, այդ նախապայմանները երկուսն են եղել՝ մեկը Մինսկի խմբի համանախագահության չեղարկումն է, որն իրականացվեց նախաստորագրման փուլում, երկրորդ պահանջը ՀՀ Սահմանադրության այնպիսի փոփոխոխություն, որը Անկախության հռչակագրին հղումը կհանի»,- ասաց նա։
Աննա Գրիգորյանի խոսքով՝ Հայաստանն այսպես կոչված «արեւմտյան Ադրբեջան» դարձնելու առաջին փուլը Սահմանադրության փոփոխությունն է։
«Այս պառլամենտը կարող է հաստատել Սահմանադրության նոր տեքստը եւ դնել հանրաքվեի, եթե դուք ունենաք մեծամասնություն։ Դուք չունեք այդ մեծամասնությունը։ Եվ մեզ էլ որեւէ մեկը չի լիազորել, որպեսզի մենք այդ փոփոխությունն իրականացնենք։ Եվ եթե կուզեք, ընտրության այս համամասնությունը, իր բոլոր խնդրահարույց կետերով հանդերձ, փրկօղակ է ձեզ, փրկօղակ է Փաշինյանին՝ հերթական ստորացուցիչ զիջմանը չգնալու։ Դրանից հետո նոր պահանջներ են գալու, նոր զիջումներ են գալու»,- նշեց նա։
Կարդացեք նաև
Ռոզա ՀՈՎՀԱՆՆԻՍՅԱՆ
