ՀՀԿ գործադիր մարմնի անդամ Էդուարդ Շարմազանովի ֆեյսբուքյան գրառումը
2010-ի օգոստոսի 20-ին Սերժ Սարգսյանի ջանքերով ռուսական 102-րդ ռազմաբազան ստանձնել է նաև ՀՀ ամբողջ տարածքի անվտանգության ապահովման գործառույթը՝ մեր զինված ուժերի հետ համատեղ։
Վերջին շրջանում հաճախ է խոսվում ռուսական 102-րդ ռազմաբազայի տեղակայման նպատակահարմարության մասին։ Մեր կարծիքով 102-րդ ռազմաբազայի տեղակայումն անչափ կարեւոր անվտանգային նշանակություն է ունեցել եւ ունի ՀՀ-ի համար՝ հաշվի առնելով թուրքական սպառնալիքը։
Չմոռանանք, որ 1992-1993թթ. Թուրքիան առնվազն երեք անգամ պլանավորում էր «չափավոր հարված հասցնել» ՀՀ-ին եւ հիմնականում ՌԴ-ի կոշտ հայտարարություններից հետո չգնաց այդ քայլին։
Կարդացեք նաև
Հարկ է նշել, որ մինչեւ 2010-ի օգոստոսի 20 -ը 102-րդ ռազմաբազայի պարտավորության շրջանակներում էր նախկին ԽՍՀՄ արտաքին սահմանների պաշտպանությունը, այսինքն` հայ-թուրքական ու հայ-իրանական սահմանը։
Հաշվի առնելով նաեւ նոր մարտահրավերների հեռանկարը՝ 2010-ի օգոստոսի 20-ին ՀՀ նախագահ Սերժ Սարգսյանն ու ՌԴ նախագահ Դմիտրի Մեդվեդեւը Երեւանում ստորագրեցին թիվ 5 արձանագրությունը, որով փոփոխություններ են կատարվել Գյումրիում տեղակայված ռուսական 102-րդ ռազմակայանի վերաբերյալ 1995 թվականի միջպետական պայմանագրում։
Արձանագրության հիմնական դրույթներն ու առանցքային փոփոխություններն էին.
1 .102-րդ ռուսական ռազմակայանի ժամկետի երկարաձգում․ ռուսական ռազմաբազայի տեղակայման ժամկետը նախկին 25 տարվա փոխարեն երկարաձգվել է մինչև 49 տարի (մինչև 2044 թվականը)։
2.Գործառույթների ընդլայնում․ բացի նախկին ԽՍՀՄ արտաքին սահմանների պաշտպանությունից, ռազմակայանը ստանձնել է նաև Հայաստանի Հանրապետության ամբողջ տարածքի անվտանգության ապահովման գործառույթը՝ ՀՀ զինված ուժերի հետ համատեղ։
3.Ռազմատեխնիկական աջակցություն․ ռուսական կողմը պարտավորվել է աջակցել Հայաստանին ժամանակակից ու համատեղելի սպառազինությամբ և ռազմական տեխնիկայով ապահովելու հարցում։
Ինչպես տեսնում ենք, նախագահ Սերժ Սարգսյանի ջանքերով ՌԴ-ն նոր պարտավորություն է ստանձնում ՀՀ զինված ուժերի հետ համատեղ ապահովել ոչ միայն հայ-թուրքական ու հայ-իրանական սահմանի անվտանգությունը,այլ նաեւ պատասխանատվություն է ստանձնում ՀՀ սահմանների ողջ երկայնքով ապահովել այդ գործառույթը։
Սա անչափ կարեւոր քայլ էր եւ լրացուցիչ անվտանգային երաշխիք, որից չկարողացան օգտվել 2018-ից հետո Հայաստանում իշխանության բերված կառավարիչները։
Նախագահ Սերժ Սարգսյանի կառավարման ողջ շրջանում հայ- ռուսական դաշնակցային ու բարեկամական հարաբերությունները կոնկրետ գործերով էին ամրապնդվում, այլ ոչ թե անպտուղ լայվերով։
