«Առաջին հերթին գործող խորհրդարանը լեգիտիմության լուրջ խնդիր ունի, ինչը չունեին նախորդ խորհրդարանն ու կառավարությունը՝ անկախ դրանց որակից եւ վարվող քաղաքականության հետ մեր անհամաձայնությունից: Եթե անգամ մյուս փաստերը մի կողմ դնենք, միայն ԲՀԿ-ից մանդատների խլումը, որը իրավական առումով որեւէ կերպ չկարողացան հիմնավորել, փոխում է ԱԺ-ի համամասնությունը», – Sputnik Արմենիա մուլտիմեդիոն մամուլի կենտրոնում նշեց «Դեմոկրատական այլընտրանք» կուսակցության առաջնորդ Սուրեն Սուրենյանցը:
Նրա խոսքով. «Այդ փաստը գուցե կասկածի տակ չի դնում ՔՊ-ի կառավարություն կազմելու իրավունքը, սակայն կասկածի տակ է դնում մի շարք բաներ, օրինակ՝ սահմանադրական օրենքներ ընդունելը, բարձրաստիճան պաշտոնյաների նշանակելը եւ այլն: Այս ամենն էական ազդեցություն ունի ԱԺ-ի խճանկարի վրա: Սա մեկ խնդիր:
Երկրորդ խնդիրը հետեւյալն է. այնուամենայնիվ, խորհրդարանի համամասնությունն այնպիսին է, որ ինքը փակուղային է, մինչդեռ անցած խորհրդարանն այդպիսին չէր: ՔՊ-ն սկզբունքորեն ինչ ուզում անում էր, նույնիսկ սահմանադրություն են փոխել քովիդի ժամանակ, իսկ հիմա այդ խնդիրն իրենք ունեն: Կամ պետք է արտաիրավական ճանապարհով 6 մանդատ գողանան ու այդ հարցը լուծեն, կամ ստացվում է, որ խորհրդարանը փակուղային է: Ընդ որում, փակուղային է եւ իշխանության, եւ ընդդիմության համար»:
Սուրեն Սուրենյանցը փաստում է. «Իսկ քաղաքական մշակույթի առումով այս խորհրդարանը նախորդ խորհրդարանից շատ չի տարբերվում: Քաղաքական դիսկուրսի մակարդակը շատ ցածր է: Այդ առումով նույնիսկ կարող է նախորդ խորհրդարանին գերազանցել»:
Կարդացեք նաև
Գոհար ՀԱԿՈԲՅԱՆ
Լուսանկարը՝ Սպուտնիկ Արմենիայի
