«Եվրոպայի խորհրդի խորհրդարանական վեհաժողովում ՔՊ պատգամավորը ի լուր աշխարհի մեղադրեց Ամենայն Հայոց կաթողիկոսին, Ռուսաստանի և Նոր Նախիջևանի հայոց թեմի առաջնորդ Տեր Եզրաս արք. Ներսիսյանին այնպիսի հանցանքների մեջ, որոնք ակնհայտ սուտ ու բացահայտ կեղծիք են: Դատապարտելի այս պահվածքը համապատասխանում է օրվա իշխանավորների ոճին և սա առաջին դեպքը չէ, երբ միջազգային բարձրագույն ամբիոնն օգտագործվում է ոչ թե երկրի շահերին սպասարկող հարցերի քննարկումների, այլ սեփական երկիրը ու ազգային Եկեղեցին վարկաբեկելու, կազմաքանդելու, թիրախավորելու և դավադրորեն հարվածելու համար»,-Aravot.am-ի հարցին ի պատասխան փոխանցեցին Ռուսաստանի և Նոր Նախիջևանի հայոց թեմի մամուլի դիվանից։
Հիշեցնենք, ԵԽԽՎ ամբիոնից իր ելույթը իշխող «Քաղաքացիական պայմանագիր» խմբակցության պատգամավոր Հռիփսիմե Գրիգորյանը նվիրեց ՀԱԵ-ին եւ, մասնավորաբար, Ռուսաստանի և Նոր Նախիջևանի հայոց թեմի առաջնորդ Տեր Եզրաս արք. Ներսիսյանին ՝ նրան «միջազգային գործակալ» անվանելով։ Ի դեպ, նիստը նախագահողն ընդհատեց Հռիփսիմե Գրիգորյանի ելույթը՝ հորդորելով մնալ թեմայի շրջանակում։
Aravot.am-ը հետաքրքրվել էր՝ ինչպե՞ս են վերաբերվում իշխող խմբակցության պատգամավորի՝ ԵԽԽՎ ամբիոնից հնչեցրած նման ելույթին, երբ նույն իշխող ուժը ներկայացնող պատգամավորները ձեռնպահ են մնում նման բարձր ամբիոնն օգտագործել՝ Բաքվում գտնվող հայ գերիների խնդիրների մասին խոսելու համար։
Կարդացեք նաև
«Ցավալի այդ դրվագը մեկ անգամ ևս ի ցույց դրեց, որ իշխանավորները չունեն դիվանագիտական էթիկա, պետական մտածողություն, չեն հարգում օրենքի գերակայությունն ու անձի արժանապատվությունը: Հիշյալ պատգամավորուհին թաղային բամբասանքի մակարդակով, առիթն օգտագործեց սևացնելու հայ ժողովրդին ու մեր դարավոր Եկեղեցին: Ուստի տեղին էր, որ նախագահողը կտրուկ ընդհատեց նրա խոսքը՝ կանխելով ժողովրդավարության բարձրագույն ատյանում անհեթեթ ու ստահոդ լուրեր հրամցնելու վերջինիս փորձը»,- ասված է Aravot.am-ին տրամադրված պատասխանում:
Նելլի ԳՐԻԳՈՐՅԱՆ
