Այս ուսումնական տարվանից ՀՀ պետական բուհերի մեծամասնությունը թանկացրել է բոլոր մասնագիտությունների գծով ուսման վարձավճարները:
Ընդհանուր առմամբ վարձավճարների թանկացում չի գրանցվել Մ. Հերացու անվան պետական բժշկական, Խ. Աբովյանի անվան պետական մանկավարժական, Հայաստանի պետական ագրարային համալսարաններում: Ֆիզիկական կուլտուրայի պետական ինստիտուտում ևս վարձավճարները չեն թանկացել: Մյուս պետական բուհերում ուսման վարձավճարներն աճել են 100-200 հազար դրամով:
Aravot.am-ը տարբեր բուհերի առաջին կուրսեցիներից բազում դժգոհություններ է ստանում, նրանք նշում են, թե ուսման վարձավճարի թանկացման պատճառով հրաժարվում են հաճախել բուհ:
Բուհերի պատասխանատուների հետ զրույցում հետաքրքրվեցինք՝ արդյոք այս տեղեկությունները համապատասխանո՞ւմ են իրականությանը և արդյոք վարձավճարների թանկացման հետևանքով գրանցվե՞լ է դիմորդների թվի նվազում:
ԵՊՀ հասարակայնության հետ կապերի եւ լրատվության վարչության պատասխանատու Կարեն Գրիգորյանը մեր զրույցում հավաստիացրեց. «ԵՊՀ-ում երբեք ուսման վարձը չվճարելու պատճառով ուսանող դուրս չի մնացել՝ անկախ թանկացումներից: Մենք տարեկան երկու հարյուրից ավելի ուսանող ենք հեռացնում, որոնցից ընդամենը 7-8-ն են, որ վարձը չվճարելու պատճառով են դուրս մնացել, և նրանք սոցիալապես անապահով չեն եղել: Ուստի սոցիալապես անապահով ուսանողն ուսման վարձը չվճարելու պատճառով երբեք դուրս չի մնացել Մայր բուհից»:
Կարդացեք նաև
Պատասխանելով դիմորդների թվի նվազման հետ կապված մեր հարցին՝ Կ. Գրիգորյանը տեղեկացրեց. «Դիմորդների թիվը մոտ քսան տոկոսով կրճատվել է, ինչը կապված է դպրոցների շրջանավարտների թվի կրճատման հետ: Այս հանգամանքի հետևանքով՝ կրճատվել է նաև այլ բուհեր ընդունվածների թիվը: Սակայն դրանց հետ համեմատած՝ համալսարանը բարվոք վիճակում է գտնվում: Ուստի կարող ենք եզրակացնել, որ դիմորդների թվի կրճատումը վարձավճարների թանկացման հետ կապ չունի»:
Կ.Գրիգորյանը փաստեց, որ ԵՊՀ-ում նվազագույն վարձավճարը 400 հազար դրամ է, և ոչ մի պետական բուհում նման գին գոյություն չունի: Նա նշեց, որ թանկացումները վերաբերում են բոլոր ֆակուլտետներին. բակալավրիատում թանկացումը կատարվել է 100 հազար դրամի չափով, իսկ մագիստրատուրայում՝ 20-100 հազար դրամի չափով: Կ. Գրիգորյանը նաև փոխանցեց, որ ստացել են ԿԳ նախարար Արմեն Աշոտյանի նամակը, համաձայն որի՝ բուհի կարգում էլ փոփոխություն պիտի արվի, որը ի նպաստ ուսանողի է լինելու:
ՀՊՏՀ լրատվության և հասարակայնության հետ կապերի բաժնի պետ Գոհար Գևորգյանն էլ նույն խնդիրների կապակցությամբ ասաց. «Նման դեպքեր մեզ հայտնի չեն: Ինչ վերաբերում է դիմորդների թվին, ապա այս առումով թվի նվազում չունենք, ընդհակառակը, մեզ մոտ այս տարի ավելի շատ դիմորդներ են եղել, քան հատկացված ուսուցման տեղերն են»:
Տնտեսագիտականում ևս ուսման վարձի թանկացումներ եղել են: Ինչպես տեղեկացրեց Գ. Գևորգյանը, բոլոր մասնագիտությունների գծով թանկացումը եղել է 50-100 հազար դրամի չափով՝ բացառությամբ երկու մասնագիտությունների, որոնց պարագայում թանկացումը կատարվել է 150 հազար դրամի չափով:
Տաթև ՀԱՐՈՒԹՅՈՒՆՅԱՆ
