Ավիատոմսերի գները բարձրացել են, որովհետեւ պահանջարկը մեծացել է. Քաղավիացիայի ղեկավար

Ավիատոմսերի գները բարձրացել են, որովհետեւ պահանջարկը մեծացել է. Քաղավիացիայի ղեկավար

Ինչո՞ւ են ավիատոմսերի գները կտրուկ թանկացել, այսօր կառավարության նիստից հետո այս հարցին կառավարությանն առընթեր Քաղաքացիական ավիացիայի գլխավոր վարչության պետ Սերգեյ Ավետիսյանը պատասխանեց, որ թանկացումը պայմանավորված է պիկ սեզոնով եւ պահանջարկի մեծացմամբ. «Զբոսաշրջային հոսքերն ամբողջ աշխարհում ունենում են պիկային ժամանակաշրջան, եւ մենք այս պահին գտնվում ենք հենց այդ պիկային ժամանակաշրջանում: Այս տարվա իմաստով սպեցիֆիկ երկրորդ բաղադրիչն այն է, որ բաց երկնքի քաղաքականության ուղղությամբ տարվող սիստեմատիկ աշխատանքը բերեց նրան, որ ՀՀ-ն ավիացիոն միջազգային քարտեզի վրա ավելի ցայտուն դեր ունեցավ ու ակտիվացրեց իր դիրքերը, դեպի մեր երկիր գալու պահանջարկն ավելացավ»,- ասաց նա:

Ըստ պարոն Ավետիսյանի՝ ավիաընկերություններն իրենց ամառային սեզոնի չվերթները ծրագրում են բավական վաղ, 8-10 ամիս շուտ նրանք արդեն կազմում են իրենց աշխարհագրության քարտեզը, ուստի պլանավորածից ավելի պահանջարկ ունենալու դեպքում, նման իրավիճակ է ստեղծվում:
Սերգեյ Ավետիսյանի խոսքով, ավիաընկերություններն իրենց հաշվարկներում սխալվել են եւ պահանջարկն ավելի մեծ է. «Տեսնելով իրավիճակը՝ ավիաընկերությունները փորձում են փոփոխություններ մտցնել իրենց չվացուցակի մեջ՝ ավելացնելով թե’ չվերթների քանակը, թե’ օդանավերի տիպերը: Արդեն իսկ մի շարք ավիաընկերություններ փոխել են իրենց օդանավերի տիպերը՝ ավելացնելով իրենց նստատեղերի քանակը»:

Aravot.am-ի հարցին, թե կառավարությունն արդեն մեկ տարի է տուրիզմը զարգացնելու ուղղությամբ մեծ ջանքեր է գործադրում, արդյոք կանխատեսելի չէր պահանջարկի ավելացումը, որպեսզի ավիաընկերությունների հետ համագործակցությամբ այդ խնդիրը լուծվեր, պարոն Ավետիսյանն ասաց, որ դա անկանխատեսելի էր եւ որ շատ հնարավոր է հաջորդ տարի էլ կարող է նման իրավիճակ ստեղծվի:

Մեր այն հարցին, թե մեր երկրում ավիատոմսերի գների թանկ լինելը ավիացիայի ոլորտի մասնագետները նաեւ պայմանավորում են ռուսական ավիաընկերությունների` դաշտը գրավելով, եւ չեն բացառում, որ նրանք հակամրցակցային համաձայնության են գալիս, ինչի պատճառով մեր երկրում ավիատոմսերը չեն էժանանում, Սերգեյ Ավետիսյանը չհամաձայնեց, որ նման բան կարող է լինել:
Քաղավիացիայի ղեկավարն ասաց, որ սեպտեմբերի երկրորդ կեսից սկսած տոմսերի գները երկու-երեք անգամ կիջնեն:

Լուսինե ԲՈՒԴԱՂՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք